Almatyda Qazaqstan halqynyń bírlígí kúní keń kólemde árí mazmūndy túrde atap ótíldí. Qalanyń barlyq audanynda kontsert, festıval, jármeńke men túrlí mádenı ís-sharalar ótkízíldí, – dep habarlaıdy aqshamnews.kz tílshísí.
Merekeníń basty ortalyǵy Abaı alańynda «Bírlígí jarasqan Almaty» atty dostyq festıvalí óttí. Kúní boıy sahnada estrada jūldyzdary, shyǵarmashylyq ūjymdar men bı toptary óner kórsetíp, bírlík pen mádenı ártúrlílíktí dáríptedí. Keshkísín merekelík ís-shara tanymal artıster qatysqan Dostyk Fest kontsertímen jalǵasyn tapty.
Qala tūrǵyndary men qonaqtarynyń nazaryn túrlí etnos ókílderíníń ūlttyq taǵamdary ūsynylǵan gastronomıyalyq jármeńke erekshe audardy. Būl alań eldíń kópūltty mádenı baılyǵyn aıqyn kórsetken orynǵa aınaldy.
Ís-sharalar ortalyqpen shektelmeı, Almatynyń barlyq audanynda óttí. Saıran kólínen bastap Tūńǵysh Prezıdent sayabaǵyna deıíngí qoǵamdyq keńístíkterde kontsertter, kórmeler, sporttyq sharalar men túrlí mádenı baǵdarlamalar ūıymdastyryldy. Aınabūlaq shaǵynaudanynda ūlttyq kıím kıgen tūrǵyndar qatysqan merekelík jıyndar ótse, Túrksíb audanynda etnomádenı kórmeler men sporttyq jarystar ótkízíldí.
Qalanyń mádenıet oshaqtarynda dostyq pen kelísím qūndylyqtaryn nasıhattaıtyn kórme, kontsert, dárís jáne qaıyrymdylyq spektaklder ūıymdastyryldy.
Merekelík kún keshkí kontserttík baǵdarlamalarmen jáne qala tūrǵyndaryn bír arnaǵa toǵystyrǵan «Bírlík júgíruí» atty neondyq júgíríspen qorytyndylandy.
1 mamyr Almatynyń túrlí etnos ókílderí beıbítshílík pen ózara qūrmet ayasynda ómír súretín bereke-bírlíktíń qalasy ekenín taǵy bír márte aıqyndady.