Balalar arasynda mekómektiń qandaı túrine degen suranys joǵary bolyp tur jáne oǵan qansha qarjy jumsaldy. Balalardy qorǵaý kúni qarsańynda MSQ Almaty qalalyq fılıaly osy taqyrypqa qatysty málimettermen bólisti.
Densaýlyǵy endi qalyptasyp kele jatqan bala jany óte názik. Bizdiń úkimetimiz balalarǵa qoljetimdi, der kezinde medısınalyq kómek kórsetý arqyly dúnıege kelgen sátten bastap erekshe qamqorlyq jasap keledi. Al, medısınalyq saqtandyrý júıesinde balalar 18 jasqa deıin memleket tarapynan saqtandyrylǵan.
Qazir Almaty qalasynda 18 jasqa deıingi 644 myńnan astam bala turady. Olardyń árqaısysy ýaqytyly ári sapaly medısınalyq kómek alýǵa quqyly.
Stasıonarlyq medısınalyq kómek
Bıyl 4 aıda Almatyda 35 myńnan astam bala kepildendirilgen tegin medısınalyq kómek jáne MÁMS paketteri sheńberinde stasıonarlyq em alǵan. Buǵan Qor 10 mlrd teńgeden astam qarajat bóldi. Stasıonarda kórsetilgen em-domnyń deni juqpaly aýrýlar, hırýrgıa, ýrologıa, nevrologıa, neırohırýrgıa jáne reabılıtasıa baǵyttary.
Onyń ishinde – 83 ota joǵary tehnologıalardyń kómegimen jasalǵan. Buǵan Qor 348,4 mln teńge tóledi.
Balalarǵa kórsetilgen kómek arasynda medısınalyq ońaltýdyń alatyn orny erekshe. Ótken 4 aıda qala boıynsha 3 086 bala jalpy quny 898,6 mln teńgelik reabılıtasıadan ótken. Olardyń arasynda aýyr dertter men kúrdeli otadan keıin densaýlyǵyn qalpyna keltirýge múmkindik alǵan balalar da bar.
Bastapqy medısınalyq kómek jaıly
2025 jyldyń bastapqy 3 aıynda balalar 360 myńnan astam salalyq mamannyń konsýltasıasyn alǵan. Kóbine olar oftalmolog, hırýrg, lor, stomatolog jáne nevropatolog mamandarǵa júgingen.
Aýrýdyń aldyn alýǵa baǵyttalǵan profılaktıkalyq tekserýler – bala densaýlyǵyn saqtaýdyń ajyramas bóligi. Qala emhanalarynda 300 myńnan astam bala tegin profılaktıkalyq tekserýden ótken. Oǵan 857,4 mln teńge jumsaldy.
Sonymen qatar, balalar mektepterde de úzdiksiz medısınalyq kómekpen qamtamasyz etilgen. Bul ásirese, densaýlyǵy turaqty qadaǵalaýdy qajet etetin balalar úshin mańyzdy baǵyttardyń biri. Atalǵan ýaqyt aralyǵynda bilim ordalarynda 4 547 oqýshyǵa medkómek kórsetilgen.
Mektepte oqıtyn balalardy tegin dári-dármekpen qamtamasyz etý qarastyrylǵan. Osy ýaqyt ishinde sozylmaly aýrýlarmen esepte turǵan 19 myńnan astam balaǵa 2,5 mlrd teńgeniń dárisi berilgen.
MÁMS engizilgeli beri stomatologıalyq kómektiń balalarǵa qoljetimdi bola bastaǵan aıta ketken jón. Búginde almatylyq balalar emhanalar men jeke menshik klınıkalarda tegin stomatologıalyq kómekke júginip, karıes, alveolıt, pýlpıt, perıodontıtti emdep jatyr. Buǵan Qor 742 mln teńge jumsady.
Keıingi jyldary almatylyq ata-analardyń bala jazǵy demalysqa shyqqan kezde tisin emdetýdi jaqsy ádetke aınaldyrǵany baıqalady. Munyń yńǵaıly ári tıimdi ekeni daýsyz. Qormen jumys istıetin stomatologıalyq klınıkalar tizimin MSQ Almaty fılıalynyń Instagram-paraqshasynda kórsetilgen: @msqory_almaty.