Almaty qalasynyń ákímí Darhan Satybaldy Urbanıstıka ortalyǵynyń ūjymymen abattandyruǵa jáne jaıly qalalyq keńístíkter qūruǵa júıelí tásílderdí ázírleu jáne engízu máselelerí boıynsha keńes ótkízdí. Urbanıstıka ortalyǵy aǵymdaǵy jyldyń shílde aıynda Almaty Damu ortalyǵynyń bazasynda sáulet, landshaftyq dızaın jáne kógaldandyru salasyndaǵy sarapshylardy bíríktíre otyryp qūrylǵan bolatyn.
Keńes barysynda Urbanıstıka ortalyǵynyń ókílderí qalalyq ortany jańǵyrtuǵa qatysty júrgízílíp jatqan jūmystar men negízgí jobalar turaly aıtyp berdí.
Ortalyqtyń negízgí míndetterí-qalanyń syrtqy kelbetín jaqsartu úshín bíryńǵaı stıldí qalyptastyru, jaıly qoǵamdyq keńístíkterdí abattandyru boıynsha jobalardy ázírleu jáne kógaldandyruǵa ozyq tásílderdí engízu.
Búgíngí tańda Urbanıstıka ortalyǵy jasyl jelekterdí kútíp ūstau men qorǵaudyń qoldanystaǵy erejelerín kúsheıtuge arnalǵan kógaldandyru Jarǵysyn ázírleude. Qūjat otyrǵyzatyn materıaldardy standarttaudy, onyń assortımentín jáne kútíp-baptau sapasyn, aǵash bıíktígíne, tamyrdyń dıametríne jáne kútím standarttaryna qoıylatyn talaptardy arttyrudy kózdeıdí.
Būdan ózge, kósheler men rekreatsıyalyq aımaqtardy jobalau jóníndegí nūsqaulyqty, sondaı-aq materıaldardyń sapasyna qoıylatyn bíryńǵaı talaptardy qamtıtyn abattandyru qaǵıdalarynyń jınaǵyn qūru boıynsha jūmys júrgízílude.
Qala basshysy Darhan Satybaldy jobalardy íske asyrudyń barlyq kezeńderínde júıelí tásíl men sapany baqylau basymdyq bolyp tabylatynyn atap óttí.
«Basqarmalar men audan ákímdíkterí jobalardy íske asyru kezínde battandyru men kógaldandyrudyń bíryńǵaı erejelerín qatań saqtauy tıís. Urbanıstıka ortalyǵy avtorlyq monıtorıng funktsıyalaryn oryndaıdy jáne Qoǵamdyq keńístíkterdí damytu basqarmasymen bírlesíp abattandyru tūjyrymdamalaryn ázírleuge qatysady», - dedí Darhan Satybaldy.