Óńirlik komýnıkasıalar qyzmetiniń alańynda RMK «Qazavıaormanqorǵaý» Almaty avıasıalyq bólimshesiniń mamandary 2025 jylǵy órt qaýpi joǵary maýsymnyń qorytyndysyn usynyp, taýly-ormandy jerlerde aldyn-alý jumysyn kúsheıtý úshin qolǵa alynǵan is-sharalar týraly habarlady. Bólimshe jetekshisi Bekzat Baıshalovtyń aıtýynsha, bıylǵy maýsymda jaýyn-shashyn az bolyp, tabıǵı órttiń paıda bolý men jyldam taralý qaýpin edáýir arttyryp jibergen. Bólimshe qaraýyndaǵy orman qory 672 myń gektardaı bolady, onyń quramyna jeti memlekettik komýnaldyq mekeme, úsh ulttyq tabıǵı park pen bir memlekettik qoryq kiredi.
Maýsym qorytyndysy boıynsha aýmaqta 28 orman órti tirkelip, onyń 22-si taýly aımaqta bolypty. Jalpy órt shalǵan aýdan 79 gektardy qurap, onyń 46 gektary ormandy, 33 gektary ormansyz aýmaq boldy. Eń kóp salmaq túsken aýmaq - İle-Alataý MUTP. Munda 26 gektardaı jerde 21 órt shyqqan.
«Qaýipsizdikti qamtamasyz etýde erte anyqtaý jaǵy mańyzdy ról atqardy. 28 oqıǵanyyń 7-i avıasıa arqyly anyqtalyp, bul jalpy kórsetkishtiń 41%-yn qurady. Bul kórsetkish budan da joǵary bolýy múmkin edi, alaıda avıasaqshylarǵa bólingen saǵattyń azdyǵyna baılanysty áýeden tolyqtaı baqylaýǵa múmkinshilik bolmady», – deıdi Bekzat Baıshalov.
Avıasıa órt sóndirý qyzmeti órtti sóndirý men joıý jumystaryna belsendi qatysqan. 2025 jyly olar 75% jaǵdaıǵa aralasyp, 21 órt solardyń qolymen sóndirildi. Jumystar kúndiz de, túnde de júrgizildi.
Áýeden baqylaý men jedel áreket etý úshin bıyl myna resýrstar bólindi:
* ushaq – 372 saǵat ushý ýaqyty,
* 2–3 klasty tikushaqtar – 285 saǵat,
* 1 klasty tikushaq – 85 saǵat.
Maýsym barysynda orman ıelenýshilerdiń, tabıǵatty qorǵaý polısıasynyń, balyq ınspeksıasynyń jáne salalyq mekeme mamandarynyń qatysýymen turaqty avıareıdter de júrgizildi. Nátıjesinde tabıǵat qorǵaý zańnamasyn buzýǵa qatysty tórt ákimshilik quqyqbuzýshylyq anyqtaldy.