Almatyda qala ákimi Darhan Satybaldynyń tóraǵalyǵymen ótken Óńirlik ınvestısıalyq shtab otyrysynda kólik, energetıka, ónerkásip jáne ınovasıa salalaryndaǵy qoldanystaǵy ári keleshektegi ınvestısıalyq jobalar jan-jaqty talqylandy.
Jıyn barysynda GTS-2 júk termınalyn damytý, jylý elektr stansıasyn salý, avtobýs parkin jańǵyrtý jáne zarádtaý ınfraqurylymyn júıeli túrde damytý jaıy talqylandy. Buǵan qosa, gaz toltyrý stansıalaryn qurýǵa qatysty jobalar da qaraldy.
Ónerkásiptik baǵytta jańa býyndaǵy temirbeton buıymdaryn shyǵaratyn zaýyt salý jáne avtokólik oryndyqtaryn óndirý kólemin arttyrýǵa arnalǵan jobalar usynyldy.
Saıran mańynda ınovasıalyq qalalyq SES pen jasandy ıntellekt mýzeıin qurý jónindegi bastama tanystyryldy. Bul joba energetıka, zamanaýı tehnologıa men bilim berý salalaryn toǵystyryp, bolashaqta qalaǵa serpin beretin ortalyq retinde sıpattaldy.
Otyrys qorytyndysy boıynsha qala ákimi tıisti basqarmalarǵa atalǵan jobalardy odan ári qoldap, árbirin tıanaqty túrde pysyqtaýdy tapsyrdy. Investısıalyq shtab turaqty jumys istep, qolǵa alynǵan bastamalardyń oryndalýyna baqylaý kúsheıtiledi.