Almaty qalasynyń ákímdígínde «GITEX Central Asia/Kazakhstan 2026» halyqaralyq forumyn ótkízu turaly ūsynysty qarauǵa arnalǵan keńes óttí. Talqylauǵa qalanyń Tsıfrlandyru basqarmasynyń ókílderí men Dubai World Trade Centre (DWTC) kompanıyasynyń ís-sharalardy basqaru jóníndegí vıtse-prezıdentí Trıksı Lomırmand qatysty.
Forumdy 2026 jyly 2-4 mausym aralyǵynda «Atakent» kórme ortalyǵynyń aumaǵynda ótkízu josparlanyp otyr. Ís-sharanyń bastamashysy – DWTC-tíń enshíles kompanıyasy jáne 1981 jyldan berí jyl saıyn Dubaıda ótetín álemdegí eń írí tehnologıyalyq kórme GITEX GLOBAL-dyń ūıymdastyrushysy Kaoun International kompanıyasy.
Būl bastamany júzege asyru Qazaqstan Respublıkasynyń Prezıdentí Qasym-Jomart Toqaevtyń «Jasandy ıntellekt dáuíríndegí Qazaqstan: ózektí míndetter jáne olardy tsıfrlyq transformatsıya arqyly sheshu» atty halyqqa Joldauynda aıqyndalǵan míndetterge saı keledí. Memleket basshysy Joldauynda Qazaqstannyń basty maqsaty – Eurazıyanyń tsıfrlyq habyna aınalu ekenín atap, bíryńǵaı ūlttyq tsıfrlyq ekojúıení qalyptastyru men zamanauı ÍT-sheshímderdí ekonomıkaǵa engízudí jedeldetudí tapsyrǵan bolatyn.
Almatyda GITEX Central Asia forumyn ótkízu – osy strategıyalyq maqsattardy júzege asyru jolyndaǵy mańyzdy qadam bolmaq. Būl shara elímízge álemdík deńgeıdegí tehnologıyalyq kompanıyalardy tartuǵa, sondaı-aq ınnovatsıyalar salasyna ınvestıtsıya tartuǵa múmkíndík beredí.
GITEX forumy 105 elden kelgen 6,8 myńnan astam kompanıyany bíríktíríp, tájírıbe almasu men strategıyalyq seríktestíkter ornatudyń jetekshí alańy. Forumnyń Almatyda ótuí Ortalyq Azıya elderíníń jahandyq tehnologıyalyq keńístíkke yqpaldasuyna jáne halyqaralyq yntymaqtastyqty nyǵaıtuǵa jol ashady.
GITEX Central Asia 2026 baǵdarlamasyna paneldík sessıyalar, ınnovatsıyalar kórmesí, ınvestorlarmen kezdesuler ótíp, otandyq ÍT-sheshímder tanystyrylady. Qazírgí tańda forumdy joǵary halyqaralyq deńgeıde ótkízu úshín ūıymdastyrushylyq jáne tehnıkalyq jaıttar egjeı-tegjeılí pysyqtalyp jatyr. Ís-sharany joǵary halyqaralyq deńgeıde ótkízu úshín áleuettí alańdar men qajettí ınfraqūrylymdyq sheshímder qarastyrylyp jatyr.
