"Ūmaı" jáne "Jasyl ıpoteka" ıpotekalyq baǵdarlamalaryn qarjylandyru osy jyldyń shílde-tamyz aılarynda bastalady dep josparlanyp otyr. Būl turaly Otbasy bank basshysy Lázzat Ibragımova málímdedí, – dep habarlaıdy aqshamnews.kz tílshísí.
Otbasy bank Azıya damu bankímen memorandumǵa qol qoıǵan. Qazír barlyq qajettí resmı qūjattarǵa qol qoyu protsesí júríp jatyr.
"Qarjylandyrudyń jalpy kólemí 90 mlrd teńge. Jospar boıynsha qarajattyń 50 paıyzy "jasyl" ıpotekaǵa, al taǵy 50 paıyzy "Ūmaı" ıpotekalyq baǵdarlamasyna baǵyttalady. Osylaısha, ár baǵdarlamaǵa 45 mlrd teńgeden keledí", - dedí Ibragımova Úkímet úıínde ótken baspasóz máslıhatynda.
Onyń aıtuynsha, Azıya damu bankí bırjada teńgemen oblıgatsıyalar shyǵarady. Eger olardyń mólsherlemesí shamamen 16 paıyz bolsa, ıpoteka shamamen 17 paıyzben beríledí.
"Qazír bíz bırjadaǵy oblıgatsıyalar boıynsha kírístílík mólsherlemesí bírshama tómendeuín – shamamen 14–12 paıyz nemese 13 paıyz deńgeıíne deıín túsuín kútíp otyrmyz. Osydan keıín baǵdarlamany íske qosudy josparlap otyrmyz. Aldyn ala jospar boıynsha baǵdarlama shílde – tamyz aılarynda bastalady dep kútíledí", - dedí Otbasy bank basshysy.
