Almatydaǵy Perınatologıya jáne balalar kardıohırurgıyasy ortalyǵynyń aumaǵynda «Náresteler alleyasy» ashyldy, – dep habarlaıdy aqshamnews.kz tílshísí.
Igí bastama ayasynda osy Ortalyqta dúnıege kelgen balalardyń otbasylary 80 túp alma aǵashyn ektí. Būl turaly qalanyń Qoǵamdyq densaulyq saqtau basqarmasynyń ókílderí aıtty.
Aktsıyaǵa balalarymen bírge ata-analar, ata-ájeler qatysty. Ís-shara barysynda Almaty qalasy Qoǵamdyq densaulyq saqtau basqarmasynyń basshysy Marat Pashımov qatysushylardy alleyanyń ashyluymen qūttyqtady.
«Būl alleya – ómírdíń, otbasylyq baqyt pen úmíttíń sımvoly. Ár aǵash sábıdíń ómírge keluímen sabaqtasyp, ár otbasynyń tarıhyndaǵy erekshe sáttí beıneleıdí. Alma aǵashtary tamyryn tereńge jaıyp, jaıqalyp óssín. Olarmen bírge balalarymyz da ósíp, dení sau, baqytty bolyp erjetsín», – dedí Marat Pashımov.
Ol zamanauı medıtsına – tehnologıya men joǵary dáldíktegí medıtsınalyq kómek qana emes, eń aldymen ár balanyń ómírí men densaulyǵyna degen qamqorlyq ekenín atap óttí.
2022-2025 jyldary Ortalyqta 33 myńnan astam sábı dúnıege keldí, 1,6 myńnan astam jańa tuǵan nárestege jansaqtau jáne qarqyndy terapıya bólímderínde medıtsınalyq kómek kórsetíldí.
Otbasylarmen bírge egílgen 80 alma aǵashy Ortalyq aumaǵyndaǵy jańa «Náresteler alleyasynyń» negízín qalady.