Almatyda memlekettík qyzmet júıesín qalaı reformalaıtynyn aıtty, – dep habarlaıdy aqshamnews.kz tílshísí.
Qazaqstannyń memlekettík organdary memlekettík qyzmettíń sapasyn arttyryp, halyqpen ashyq baılanys ornatuǵa basymdyq beretín jańa jūmys modelíne kóshíp jatyr. Óńírlík kommunıkatsıyalar qyzmetínde Almaty qalasy boıynsha Memlekettík qyzmet ísterí departamentíníń basshysy Erkebolat Nūrjígítov 2026 jylǵy 19 mamyrda Memleket basshysy qol qoıǵan «Qazaqstan Respublıkasynyń memlekettík qyzmetí turaly» zańnyń jańa redaktsıyasyna túsíníkteme bere otyryp jurnalısterge osylaı dep málímdedí.
Spıkerdíń aıtuynsha, jańa zań memlekettík qyzmettí zamanǵa saı, ıkemdí árí azamattarǵa túsíníktí etu úshín qajet eken. Bılík ókílderí memlekettík organnyń jūmysy jyldam árí tıímdí bolady, memlekettík qyzmetshíler de halyqtyń sūranysyna beıímdelíp, ashyq árí kásíbı bola túsedí dep otyr.
«Qoldanystaǵy zań 2015 jyly qabyldanǵan, sodan berí memlekettík qyzmet jańa syn-qaterge tap boldy. Qazír azamattar jyldam, túsíníktí árí sapaly qyzmet kútedí, júıeníń ózí soǵan ıkemdí boluy tıís. Sondyqtan zańnamany jańartyp, ony jańa talapqa beıímdedík», — deıdí Erkebolat Nūrjígítov.
Zańnyń jańa nūsqasynda alǵash ret memlekettík qyzmettí ótkeru tártíbímen qatar, onyń qandaı qaǵıdatqa negízdeluí kerektígí de bekítíldí. Olardyń qatarynda kásíbılík, ashyqtyq, klıentke baǵdarlanu, ádeptílík, mínsíz bedel, sondaı-aq jemqorlyq pen múdde qaqtyǵysyna tózbeushílík te bar.
Qūjatta memlekettíń servıstík modelíne erekshe nazar audarylǵan. Endí júıeníń ortalyǵynda formaldy tásíl men byurokratıya emes, adam men onyń mūqtajdyǵy tūruy tıís.
«Servıstík model degenímíz — memlekettíń adamǵa barynsha qolaıly boluy. Ol formaldy rásímge emes, naqty máselení sheshuge nazar audarady. Memlekettík qyzmetshí tek funktsıya oryndaushy emes, halyqqa kómektesíp, qoǵammen ashyq dıalog ornatatyn maman boluy kerek», — deıdí spıker.
Ózgerís memlekettík qyzmet kórsetu júıesíne de áser etedí. Bılík bas artyq rásímderdí qysqartyp, memlekettík organdarmen ózara árekettesudí jeńíl árí yńǵaıly etpek oıda. Atap aıtqanda, azamattardyń ótíníshí túrlí sebeppen qarausyz qalmauy tıís, jūmys barysy da jyldam árí túsíníktí boluy qajet.
Departament basshysynyń aıtuynsha, jańa zań memlekettík qyzmetshílerdíń jūmysynyń sapasy men olardyń halyq aldyndaǵy jauapkershílígíne qoıylatyn talapty kúsheıtedí.
«Aamattardyń memlekettík qyzmettíń sapasyna kóńílí toluyna basymdyq berdík. Ótíníshtí qarau merzímíne, jauaptyń tolyqtyǵy men aqparattyń qoljetímdílígíne qoıylar talap kúsheıedí. Memlekettík mekemeníń jūmysy túsíníktí, jyldam jáne tıímdírek boluy tıís», — dedí Erkebolat Nūrjígítov.
Basty jańalyqtyń bírí — mínsíz bedel ınstıtutynyń engízíluí. Zańda qandaı jaǵdaıda adamnyń memlekettík qyzmetke qabyldanbaıtyny nemese qyzmetín jalǵastyra almaıtyny naqty aıqyndalady.
Sonymen qatar bılík jastardy memlekettík qyzmetke kóptep tartudy josparlap otyr. Bolashaq memlekettík qyzmetshíler úshín bílím beru baǵdarlamasy men kásíbı daǵdyndy damytu júıesí engízíledí.
Kadrlardy íríkteu júıesí de eleulí ózgeríske ūshyraıdy. Konkurs tolyqtaı «E-qyzmet» júıesí arqyly tsıfrlyq formatqa kóshedí. Sonyń arqasynda íríkteu merzímí 5–7 jūmys kúníne deıín qysqaryp, kandıdatty jasyryn túrde baǵalau men úzdíkterdí avtomatty túrde íríkteu arqyly rásímníń ashyqtyǵy artpaq.
«Íríkteudíń tsıfrlyq formaty barlyq kandıdatqa teń múmkíndík beríp, adamnyń yqpalyn azaıtady. Būl konkursty barynsha ashyq árí obektıvtí etedí. Sonymen qatar qaǵazbastylyqty qysqaryp, memlekettík qyzmetke qabyldau protsesí jedeldeıdí», — dedí Almatydaǵy Memlekettík qyzmet ísterí departamentí basshysynyń orynbasary Shynaraı Álímhan.
Zańdy ázírleushílerdíń píkírínshe, būl ózgeríster memlekettík basqarudyń tıímdílígín arttyryp, azamattardyń memlekettík organǵa degen senímín kúsheıtíp, memleket pen qoǵam arasyndaǵy ózara baılanysty barynsha yńǵaıly árí túsíníktí ete túsuge sep bolmaqshy.