Almaty qalasynyń 2025 jylǵa arnalǵan búdjetin qorytyndy naqtylaý jobasy máslıhat depýtattarynyń qaraýyna usynyldy. Bul týraly Ekonomıka jáne qarjy basqarmasynyń basshysy Baýyrjan Qudaıbergenov qala máslıhatynyń sesıasynda baıandady.
Onyń aıtýynsha, bul naqtylaý – jyl sońyndaǵy negizgi qarjylyq parametrlerdi ońtaılandyrýǵa jáne bólingen qarajattyń tıimdi ıgerilýin qamtamasyz etýge baǵyttalǵan túzetýlerdiń sońǵy kezeńi. Búdjettik baǵdarlamalardyń barlyq shyǵys bólikteri salalyq komısıalarda jan-jaqty talqylanǵan.
Únemdelgen qarjy jáne qaıta bólý
Memlekettik satyp alýlar nátıjesinde 19,5 mlrd teńge kóleminde únemdelgen qarajat qalyptasqan. Sonymen qatar, birqatar jobalardyń kezeń-kezeńimen iske asyrylýyna jáne keıbir is-sharalardyń kelesi jylǵa shegerilýine baılanysty 200 mlrd teńgeni qaıta bólý josparlanyp otyr.
Basqarma basshysy bul jalpy shyǵyndardy qysqartý emes ekenin atap ótti. Qarjylandyrý tek oryndalǵan jumystardyń rastalǵan aktileri negizinde júrgiziledi, bul búdjet qarjysyn neǵurlym tıimdi ári maqsatty paıdalanýǵa múmkindik beredi.
Qosymsha qarjylandyrýdy qajet etetin baǵyttar
Jumys kestesinen oza otyryp júzege asyrylǵan jobalar boıynsha mindettemelerdi ýaqtyly oryndaý úshin 73,4 mlrd teńge kóleminde qosymsha qarjylandyrý qajettiligi týyndap otyr.
Premer-Mınıstrdiń turaqtandyrý qorlaryn ulǵaıtý jáne áleýmettik mańyzy bar azyq-túlik taýarlarynyń tizbesin keńeıtý jónindegi tapsyrmasyna sáıkes, baǵany turaqtandyrýmen aınalysatyn uıymdardy kredıtteýge jergilikti búdjetten 8 mlrd teńge bólý usynyldy. Bul sharalar azyq-túlik qaýipsizdigin nyǵaıtýǵa, ınflásıany tómendetýge jáne baǵalardyń qoljetimdiligin qamtamasyz etýge baǵyttalǵan.
Áleýmettik jáne ınfraqurylymdyq jobalar
"Quramys" shaǵynaýdanynda salynyp jatqan emhananyń qurylysyn jalǵastyrý úshin 700 mln teńge qarastyrý josparlanǵan. Bul nysandy 2026 jylǵy tamyz aıynda ýaqytynda paıdalanýǵa berýge múmkindik beredi.
Sonymen qatar "Rahat-Mádenıet" jáne "Boraldaı" shaǵynaýdandaryndaǵy jol qurylysyn jalǵastyrý maqsatynda 1,8 mlrd teńge bólý kózdelip otyr.
Qalaishilik baǵyttar boıynsha jolaýshylar tasymalyn sýbsıdıalaý úshin 10 mlrd teńge bólý usynyldy. Bul turǵyndar úshin qoǵamdyq kólik qyzmetteriniń qoljetimdiligin qamtamasyz etýge baǵyttalǵan.