Monıtorıng toby 3 shíldege qaraǵan túní kóńíl kóteretín oryndarda karantın tártíbín būzǵan 14 jaǵdaıdy anyqtady.
Almatynyń monıtorıng toptary 3 shíldege qaraǵan túní kóńíl kóteretín oryndarda karantın tártíbín būzǵan 14 jaǵdaıdy anyqtady, dep habarlaıdy Almaty-ashamy.kz.
Máselen, Medeu audanynyń monıtorıng toptary Laureate karaokesínde 100-ge juyq kelushí bolǵanyn, osylaısha karantındík shekteulerdíń būzylǵanyn anyqtady. Karaoke íshí tar, áleumettík araqashyqtyq saqtalmaǵan, kelushíler karantındík shekteulerdí elemegen.
Qala tūrǵyndary men qonaqtary sanıtarlyq dárígerlerdíń ūsynymdary men erejelerín elemeı, toı ótkízude. Mysaly, 2 shíldeden 3 shíldege qaraǵan túní «Atmosfera» barynda 150 qonaq qatysqan saltanatty shara ótkízílgen. Būl fakt boıynsha audandyq sanıtarlyq-epıdemıologıyalyq baqylau basqarmasyna beru úshín ákímshílík materıal jınaldy.
Sanıtarlyq-epıdemıologıyalyq baqylau departamentínde atap ótkendeı, aldyn alu sharalaryn jappaı elemeudíń saldarynan koronavırustyń jańa shtamdary órshı tústí, sondyqtan qazírgí kezde saqtanu sharalaryn qatań ūstanǵan jón. Almatyda adamdardyń kópshílík jáne jabyq kóńíl kóteretín oryndarǵa, toılarǵa jáne basqa da merekelík sharalarǵa baruy jalǵasuda.
Aıta keterlígí, koronavırus dertí qalada ekí eseden de asyp tústí. Megapolıste dert jūqtyrǵan 56 myń adam tírkeldí, olardyń 4573-í - mausym aıynda auyrǵandar. 2 shíldede taǵy 385 adam koronavırus ınfektsıyasyn jūqtyrǵan. 2021 jyldyń bírínshí jartysynda dert ótken jyldyń osy kezeńímen salystyrǵanda 10 esege artqan.
Almatynyń memlekettík bas sanıtarlyq dárígerí J. Bekshın toılardyń, túrlí būqaralyq sharalar men basqosulardyń ınfektsıyany jūqtyrudyń negízgí oshaǵyna aınalǵanyn aıtty. Óıtkení, ınfektsıyanyń 55%-y qoǵamdyq oryndarda, meıramhanalar, karaoke jáne túngí klubtarda jūǵuda.
Qazírgí kezde profılaktıkalyq sharalardy saqtau óte mańyzdy, óıtkení «delta» shtamynyń aınalymy jedel, būl ınfektsıyany, ásírese, jastar tez jūqtyruda. Sondyqtan saqtyq sharalaryna erekshe mán beru kerek. Jalpy, koronavırus ınfektsıyasyn jūqtyratyndardyń basym bólígí 20-39 jastaǵy (37,6%) jáne 40-59 jastaǵy (23,2%) qala tūrǵyndary. Sanıtarlyq dárígerlerdíń aıtuynsha, KVI-dí jūqtyruǵa qoǵamnyń belsendí bólígí óte beıím.
Dárígerler men sanıtarlyq dárígerler qala tūrǵyndaryn belgílengen erejelerdí míndettí túrde saqtauǵa shaqyrady, olardyń būzyluy qauíptí vırustyń taraluyna ákeledí. Derttíń aldyn aludyń bír ǵana joly bar, ol - vaktsına saldyru.
Būryn habarlanǵandaı, 1 qańtardan 29 mausym aralyǵynda monıtorıng toptary 27800-den astam nysandy tekserdí, onyń 2463-índe zań būzushylyqtar anyqtaldy. 4581 hattama toltyrylyp, onyń íshínde zańdy tūlǵalarǵa 155 mln teńgege 442 aıyppūl salyndy. Jeke tūlǵalarǵa betperde rejımín būzǵany úshín 181,5 mln teńgege 4139 hattama jazyldy.
Aıyppūl túríndegí ákímshílík jauapkershílíkpen qatar, sottardyń sheshímí boıynsha qyzmettí toqtata tūru túrínde qatań sharalar da qoldanyluda. Aǵymdaǵy jyly sotqa 75 materıal jíberíldí, onyń 64-í boıynsha sheshím qabyldandy.