Kásípkerlerge jyl sońyna deıín tabıǵı gazǵa kóshíp, ekologıyalyq talaptardy saqtau ūsynyldy, dep habarlaıdy aqshamnews.kz tílshísí.
Almatynyń Túrksíb audanynda «Almaty – taza aua» ekologıyalyq aktsıyasy ayasynda mamandar dámhana, káuaphana, dúken jáne basqa da kommertsıyalyq nysandardyń ıelerímen túsíndíru jūmystaryn júrgízdí. Kásípkerlerge otyn, mangal paıdalanu jáne auany tazartu júıeleríne qoıylatyn talaptar eskertíldí.
Almatynyń Ekologıya jáne qorshaǵan orta basqarmasynyń málímetínshe, mamandar bírneshe qoǵamdyq tamaqtanu ornyna barǵan. Nysan ıeleríne kómír men otynnyń ornyna gaz nemese elektr jabdyqtaryn paıdalanuǵa kóshu qajettígí aıtyldy.
Qatty otyn jaǵu kezínde auaǵa tútín, kúıe jáne zıyandy zattar taraıdy. Būl jaqyn mańdaǵy tūrǵyn úılerde tūratyn adamdardyń densaulyǵyna kerí áser etuí múmkín.
Sanıtarıyalyq qaǵıdalarǵa sáıkes, tūrǵyn úılerde jáne basqa da ǵımarattarda ornalasqan qoǵamdyq tamaqtanu oryndarynda qatty otynmen jūmys ísteıtín mangaldar men tandyrlardy paıdalanuǵa tyıym salynady. Taǵam daıyndau úshín gaz jáne elektr jabdyqtary, sondaı-aq tútín men ıístí súzgíden ótkízetín jeldetu júıelerí qoldanyluǵa tıís.

Qosymsha shekteuler Almaty máslıhatynyń 2025 jyly 30 jeltoqsanda bekítken Atmosferalyq auany qorǵau qaǵıdalarynda da kózdelgen. Qūjatqa sáıkes, gazdandyrylǵan aumaqtardaǵy shyǵaryndylary tómen aımaqtarda (LEZ) óndírístík maqsatta qatty jáne sūıyq otyn paıdalanuǵa tyıym salynady. Būl talaptar 2027 jyly qańtardan bastap kúshíne enedí. Al LEZ aumaǵynda tıístí shekteuler Almaty qalasy ákímdígíníń qaulysy bekítílíp, aımaqtyń tūraqty shekaralary belgílengennen keıín qoldanysqa engízíledí.
Kásípkerlerge jyl sońyna deıín tabıǵı gazǵa kóshíp, ekologıyalyq talaptardy saqtau ūsynyldy.
Sonymen qatar dámhanalardyń bíríne Almaty qalasyn kóríktendíru qaǵıdalaryn būzǵany úshín QR Ákímshílík qūqyq būzushylyq turaly kodeksíníń 505-baby boıynsha ákímshílík hattama toltyryldy. Aıyppūl kólemí 20 AEK boldy.
2026 jyly 10 qarashadaǵy jaǵdaı boıynsha qalada kóríktendíru qaǵıdalaryn būzǵany úshín jalpy somasy 1 mln 211 myń teńge bolatyn 11 ákímshílík hattama toltyrylǵan. Olardyń qatarynda qoǵamdyq tamaqtanu oryndarymen bírge basqa da saladaǵy ūıymdar bar.
«Almaty – taza aua» aktsıyasy qalanyń barlyq audanynda jalǵasyp jatyr.