Almaty telekomýnıkasıalar jáne mashına jasaý kolejinde qalalyq Bilim basqarmasynyń qoldaýymen «Kolej túlekteriniń eńbek naryǵyndaǵy suranysy» taqyrybynda dóńgelek ústel otyrysy ótti.
İs-sharanyń negizgi maqsaty – zamanaýı eńbek naryǵy talaptaryna saı básekege qabiletti jas mamandardy daıarlaýǵa yqpal etetin negizgi faktorlardy anyqtaý jáne kolej túlekteriniń jumysqa ornalasý barysynda kezdesetin ózekti máselelerdi talqylaý boldy.
Dóńgelek ústel aıasynda qatysýshylar kelesi tórt modýl boıynsha pikir almasyp, tájirıbe bólisti:
-
PROFY MARATHON – 2025;
-
Dıplomnan jumysqa deıin: alǵashqy qadamdar;
-
Problemalar men sheshim joldary;
-
Bolashaq josparlar jáne ósý joldary.
Kolej dırektorynyń oqý isi jónindegi orynbasary A.Makeeva túlekterdiń eńbek jolyndaǵy jetistikterin atap ótip, kolejde berilgen teorıalyq bilim men áleýmettik seriktesterdiń usynǵan tájirıbelik daǵdylarynyń mańyzdylyǵyn erekshe atap ótti:
«Kúni keshe ǵana kolej qabyrǵasynan túlep ushqan túlekterimiz búginde Almatynyń jetekshi kompanıalarynda tabysty eńbek etip júr. Olardyń dóńgelek ústel barysynda bildirgen pikirlerinen kolejde alǵan bilim men tájirıbeniń kásibı mansapty bastaýǵa berik negiz bolǵanyn baıqadyq. Bul – biz úshin úlken maqtanysh», – dedi ol.