Almaty qalasynda Ūlttyq qauípsízdík komıtetí Departamentí janyndaǵy terrorızmge qarsy ortalyqtyń bastamasymen kásípkerlík basqarmasy jáne bıznes-qūrylym ókílderíníń qatysuymen oqytu semınary ótkízíldí. Ís-shara kommertsıyalyq jáne áleumettík mańyzy bar nysandarda antıterrorıstík qauípsízdíktí qamtamasyz etu máseleleríne arnaldy.
Mamandardyń aıtuynsha, bıznes nysandary halyq kóp shoǵyrlanatyn, ashyq rejımde jūmys ísteıtín oryndar bolǵandyqtan, joǵary táuekel tobyna jatady. Sauda jáne qoıma úı-jaılarynyń boluy qauípsízdík talaptaryn qatań saqtaudy qajet etedí. Osyǵan baılanysty qatysushylarǵa terrorızmge qarsy ís-qımyl salasyndaǵy zańnama talaptary jáne nysandardaǵy qauípsízdíktí ūıymdastyrudaǵy basshylyqtyń jauapkershílígí túsíndíríldí.
Semınar barysynda kásípkerlík nysandardyń antıterrorıstík qorǵaluyna qatysty normalar keńínen talqylandy. Atap aıtqanda, ótkízu rejımín ūıymdastyru, ınjenerlík-tehnıkalyq jabdyqtau, beınebaqylau júıeleríníń jūmysy, kírudí baqylau jáne kúzet qūrylymdarymen ózara ís-qımyl máselelerí qarastyryldy. Būl talaptardy oryndau tek formaldy míndet emes, qyzmetkerlerdíń, kelushílerdíń jáne múlíktíń qauípsízdígín qamtamasyz etudíń mańyzdy sharty ekení atap ótíldí.
Kezdesu barysynda qauípsízdíktí qamtamasyz etudíń praktıkalyq qyrlary da qozǵaldy. Qatysushylar íshkí baqylaudy ūıymdastyru, personaldy tótenshe jaǵdaılar kezíndegí ís-áreketterge úıretu, evakuatsıya jáne áreket etu josparlaryn jetíldíru máselelerín talqylady. Sonymen qatar kásípkerler ózara tájírıbe almasyp, bírlesken oqu-jattyǵular ótkízu jáne qauípsízdík standarttaryn jetíldíru boıynsha ūsynystaryn bíldírdí.
Ís-shara qorytyndysy boıynsha qatysushylar mūndaı kezdesulerdí tūraqty túrde ótkízu qajettígín atap óttí. Olardyń píkírínshe, mūndaı jıyndardy toqsan saıyn ūıymdastyru qauípsízdík deńgeıín der kezínde baǵalauǵa jáne jańa qauíp-qaterlerge jedel áreket etuge múmkíndík beredí.
Ūıymdastyrushylar kásípkerlík nysandarynyń antıterrorıstík tūraqtylyǵyn arttyru – úzdíksíz júrgízíletín protsess ekenín atap ótíp, būl baǵytta barlyq qyzmetterdíń úılesímdí jūmysy, táuekelderdí dūrys basqaru jáne bıznes ókílderíníń belsendí ūstanymy mańyzdy ekenín jetkízdí.