Almatyda gaz qubyry jarylyp, saldarynan kólik aýdarylyp, birneshe adam zardap shekti, - dep habarlaıdy Aqshamnews.kz tilshisi.
Kýágerlerdiń aıtýynsha, oqıǵa Buqar jyraý býlvarynyń boıynda bolǵan. Jarylystan keıin kólik aýdarylyp, jol jabyndysy búlingen. Aınala qorshaldy. Kólik júrgizýshisi men jolaýshysy aýrýhanaǵa jetkizildi.
QazaqGaz Aimaq aksıonerlik qoǵamynyń málimetinshe, 16 shildede orta qysymdy jańadan salynǵan jerasty gaz qubyryna synaq júrgizý kezinde, "SantehKomplektGrýpp" JSHS merdiger uıymynyń jumystary barysynda aýa qospasy syrtqa shyǵyp ketken. Nátıjesinde jol jabyndysy, aǵash jáne kólik zaqymdanǵan.
"Oqıǵa ornyna qalanyń barlyq tıisti apattyq qyzmet jedel jetti. Qazir ýchaske tekserilip, oqıǵanyń sebepteri anyqtalyp jatyr. Aýmaǵy qorshaýǵa alyndy, turǵyndarǵa qaýip joq. Qaza tapqandar joq", – delingen resmı habarlamada.