Esirtki satýshylardyń joly kesildi
Almatyda sıntetıkalyq esirtki satýmen aınalysqan eki jas ustaldy, dep habarlaıdy Almaty-akshamy.kz Polisia.kz-ke silteme jasap.
Qalalyq PD Tergeý basqarmasynyń óndirisinde adamdar tobymen asa iri kólemde sıntetıkalyq esirtkini satý boıynsha qylmystyq is bar. Sıntetıkalyq esirtki satýmen aınalysqan jastar Esirtki qylmysyna qarsy kúres basqarmasy qyzmetkerleriniń kózine tústi. Keıinnen, Áýezov aýdanynyń aýmaǵynda arnaıy is-sharalar kezinde 23 jastaǵy M.esimdi jigit pen 20 jastaǵy N.esimdi jas qyzdyń qylmystyq áreketteri qujattaldy.
– Saraptama júrgizgen osy is-sharalar barysynda tárkilengen zat asa kóp mólsherdegi sıntetıkalyq esirtki – “mefedron” ekendigi anyqtaldy. Eki adam da “sıntetıkany” taratýshy ǵana emes, sondaı-aq ony turaqty tutynýshylary ekendigi anyqtaldy. Birneshe kún buryn esirtki saýdasymen aınalysqan jup QR Qylmystyq is júrgizý kodeksiniń 128, 131-baptaryna sáıkes ustalyp, Almaty qalasy PD ýaqytsha ustaý ızolátoryna ornalastyryldy jáne tergeý sotynyń kelisimimen qamaýǵa alyndy. Ustalǵandardyń áreketteri QR QK-niń 297-baby 3-bóligi 1,3-tarmaqtaryna sáıkes kvalıfıkasıalanǵan. Qazirgi ýaqytta sotqa deıingi tergeý jalǵasýda, is boıynsha birqatar sot-medısınalyq saraptamalar taǵaıyndaldy, – dedi Almaty qalalyq polısıa departamenti tergeý basqarmasy bastyǵynyń orynbasary Ádil Salaev.