Medeu audanynyń Jastar komyunıtı ortalyǵynda jas eko-belsendílerdí, volonterlerdí jáne ekologıyalyq bastamalardyń avtorlaryn bíríktírgen ECO CLUB MEDEU ekologıyalyq qauymdastyǵynyń tūsaukeserí óttí, – dep habarlaıdy aqshamnews.kz tílshísí.
Jańa alań ekologıyalyq mádenıettí damytuǵa, jauapty tūtynudy nasıhattauǵa jáne «Taza Qazaqstan» respublıkalyq bastamasy ayasynda bírlesken jobalardy júzege asyruǵa baǵyttalǵan.
Kezdesuge Almaty qalasyndaǵy jastar ūıymdarynyń, volonterlík bírlestíkterdíń jáne ekologıyalyq jobalardyń 45-ten astam ókílí qatysty. Basqosuda búgínníń ózínde qaldyqtar kólemín azaıtuǵa, qoqysty bólek jınau mádenıetín qalyptastyruǵa jáne jastardy ekologıyalyq máselelerdí sheshuge tartuǵa yqpal etíp jatqan tájírıbelík bastamalar talqylandy.
Qazaqstan Respublıkasynyń Prezıdentí Qasym-Jomart Toqaev «Taza Qazaqstan» bastamasy bír rettík aktsıya emes, árbír azamattyń kúndelíktí ómír salty men qoǵamdyq mádenıetíníń ajyramas bólígíne aınaluy tıís ekenín bírneshe ret atap ótken bolatyn. Memleket basshysy qorshaǵan ortanyń tazalyǵy ár adamnyń jeke jauapkershílígínen bastalatynyn jáne tabıǵatqa janashyrlyqpen qarau ekologıyalyq sanaly qoǵam qalyptastyrudyń mańyzdy negízí ekenín erekshe atap óttí. Jańa jastar ekologıyalyq qauymdastyǵynyń qyzmetí dál osy qūndylyqtarǵa negízdelgen.
Tūsaukeser barysynda qatysushylar plastık jáne alyumınıı qaldyqtaryn, paıdalanylǵan batareyalardy jınau jáne qaıta óńdeu, ekínshí rettík shıkízatty qaıta paıdalanu, ekologıyalyq sheberlík sabaqtaryn, qalalyq senbílíkterdí, aǵartushylyq nauqandardy jáne basqa da qoǵamdyq bastamalardy tanystyrdy.
Ís-shara barysynda ūzaq merzímdí ekologıyalyq mádenıettí qalyptastyru máselesíne erekshe nazar audaryldy. Qatysushylardyń píkírínshe, ekologıyalyq jauapkershílík bír rettík aktsıyalarmen shektelmeı, kúndelíktí ómír saltyna aınaluy tıís.
Kezdesudíń negízgí taqyryptarynyń bírí bıznes qūrylymdarymen yntymaqtastyqty keńeıtu boldy. Jas eko-belsendíler plastık jáne alyumınıı qaptamada óním shyǵaratyn kompanıyalardy ekologıyalyq jobalardy qoldauǵa, qaldyqtardy jınau men qaıta óńdeu baǵdarlamalaryna belsendí qatysuǵa, sondaı-aq jauapty tūtynudy yntalandyratyn bastamalardy engízuge shaqyrdy.
Medeu audany Jastar komyunıtı ortalyǵynyń jetekshísí Rustam Qaıyrıev:
«Ekologıyalyq ózgerísterge qoǵamnyń, memlekettíń jáne bıznestíń kúsh-jígerín bíríktírmeı qol jetkízu múmkín emes. Tek bírlesken jobalar ǵana jańa ekologıyalyq mádenıettí qalyptastyryp, qorshaǵan ortaǵa jauapkershílíkpen qaraudy árbír qala tūrǵynynyń kúndelíktí ómíríníń ajyramas bólígíne aınaldyra alady», – dep atap óttí.
Ís-sharanyń jeke bólímí jastardyń ekologıyalyq bastamalary arasynda tájírıbe almasuǵa arnaldy. Qatysushylar ekologıyalyq aǵartudyń jańa formattaryn, mektep oqushylary men studentterdí tabıǵatty qorǵau qyzmetíne tartu joldaryn, sondaı-aq jaqyn arada Almaty qalasynda íske asyrylatyn bírlesken jobalardy talqylady.
Ūıymdastyrushylardyń aıtuynsha, ECO CLUB MEDEU zamanauı ekologıyalyq sheshímderdí ūsynuǵa, volonterlík bastamalardy damytuǵa jáne ekologıyalyq jauapty qoǵam qalyptastyruǵa atsalysuǵa nıettí barlyq azamattar úshín ashyq alań bolady.
Osyndaı ís-sharalardy ótkízu ekologıyalyq mádenıettí nyǵaıtuǵa, azamattyq jauapkershílíktí arttyruǵa jáne jaıly qalalyq ortany qalyptastyruǵa baǵyttalǵan «Taza Qazaqstan» jalpyūlttyq bastamasynyń maqsattaryna tolyq sáıkes keledí.
ECO CLUB MEDEU – Almatyny taza, ekologıyalyq tūrǵydan qauípsíz árí ómír súruge qolaıly qalaǵa aınaldyrudy maqsat etken jastardyń qauymdastyǵy. Olar óz ıdeyalaryn naqty jobalarǵa aınaldyryp, ekologıyalyq qozǵalysqa qala tūrǵyndaryn barynsha keńínen tartudy kózdeıdí.