Almatyda demalys kúnderi ótetin jármeńkege apta saıyn shamamen 700 tonna azyq-túlik ónimi satylady, - dep habarlaıdy Aqshamnews.kz.
Atap aıtsaq, 340 tonnadan astam et jáne et ónimderi, shamamen 280 tonna kókónis pen jemis-jıdek, 40 tonnadan astamy sút ónimderi jáne 40 tonnaǵa jýyq azyq-túlik pen tuzdalǵan taǵamdar.
Kúzdiń bastalǵaly jármeńkede Almaty men Almaty oblysy fermerleriniń jańa egin ónimi usynylyp otyr.
Jármeńkeni «Almaty» áleýmettik-kásipkerlik korporasıasy uıymdastyrǵan. Jyl basynan beri qalada 316 jármeńke ótkizildi, onda 330-dan astam fermer 1 000-nan astam ónim túrin usynǵan. Ónim aýyl sharýashylyǵy taýar óndirýshilerinen jáne qaıta óńdeýshi kásiporyndardan deldalsyz jetkiziledi, bul naryq baǵasynan tómen deńgeıde saýdalaýǵa múmkindik beredi.
Jármeńke ár senbi jáne jeksenbi kúnderi saǵat 09:00-den 18:00-ge deıin ótedi.
Ótetin oryndary:
* Almaly aýdany — Masanchı kóshesi, Gogol jáne Áıteke bı kósheleriniń arasy;
* Bostandyq aýdany — «Qazaqfılm» shaǵynaýdany, Isınalıev kóshesi;
* Áýezov aýdany — Ótegen batyr kóshesi, Abaı dańǵylynan tómen;
* Medeý aýdany — Meńdiqulov býlvary, Bekturov kóshesiniń qıylysy;
* Jetisý aýdany — «Qulager» shaǵynaýdany, Serikov kóshesi, 2.
Apta saıyn jármeńkege 30 myńnan astam adam keledi.
Demalys kúngi jármeńkeden bólek, jańa egin ónimderi qaladaǵy saýda jelileriniń sórelerinde de qoljetimdi baǵamen usynylyp otyr.
«Bereke Fest» respýblıkalyq aksıasy aıasynda saýda jelileri qazaqstandyq óndirýshilerge arnalǵan arnaıy aımaqtar bóledi. Bul ónimdi naryq qunynan tómen baǵamen satý, ishki óndiristi qoldaý jáne áleýmettik mańyzy bar azyq-túlik taýarlarynyń baǵasyn turaqtandyrýǵa múmkindik beredi.
Buǵan deıin «Bereke Fest» aıasynda Almaty qalasy Kásipkerlik jáne ınvestısıalar basqarmasy, «Almaty» ÁKK jáne Magnum, Small, Toimart saýda jelileri arasynda yntymaqtastyq týraly memorandýmdar jasalǵan bolatyn. Kelisimderge sáıkes, saýda úılerindegi áleýmettik mańyzy bar azyq-túlik taýarlaryna saýda ústemesi 10%-dan aspaýy kerek.