Almaty qalalyq №2 balalar klınıkalyq auruhanasynda ayaq-qoldyń tua bítken jáne júre paıda bolǵan aqaularyn túzetuge arnalǵan rekonstruktıvtík otalar sáttí júrgízílíp keledí, – dep habarlaıdy aqshamnews.kz tílshísí.
2026 jyly 25-28 aqpan aralyǵynda №2 balalar klınıkalyq auruhanasynyń bazasynda Máskeuden kelgen belgílí dáríger, medıtsına ǵylymdarynyń doktory, RHDU-dyń travmatologıya jáne ortopedıya kafedrasynyń professory Igor Golubevtíń qatysuymen sheberdíń sabaǵy óttí. Onyń barysynda ayaq-qolynda auyr patologıyasy bar 9 qazaqstandyq balaǵa bíregeı ota jasaldy. Sonymen qatar 20 bala professordan keńes aldy. Ís-shara ayasynda Almaty qalasy men Qazaqstannyń túrlí óńírínen kelgen 17 dáríger bílíktílígín arttyryp, tájírıbe almasty.
№2 balalar klınıkalyq auruhanasynyń dırektory Marat Rabandıyarovtyń aıtuynsha, sheberlík sabaǵy barysynda reseılík maman auruhananyń ortoped-travmatologtarymen bírlesíp kúrdelí ota jasady. Atap aıtqanda, terí jamylǵysyn kóshíru, ekzostoz saldarynan paıda bolǵan qol súıegíníń deformatsıyasyn túzetu, jaraqattan keıíngí neıropatıyalardy emdeu, Folkman kontrakturasy men Dyushen-Erb sal auruy kezínde síńír men būlshyq ettí auystyryp ornalastyru sıyaqty kúrdelí hırurgıyalyq ádíster qoldanyldy.
Aıta keteıík, balalarǵa medıtsınalyq kómek MÁMS júıesí ayasynda tegín kórsetíledí.
Professor Igor Golubevtíń aıtuynsha, būl onyń Qazaqstanǵa, onyń íshínde Almatyǵa alǵashqy sapary emes. Mūndaı bírlesken jūmys «Samūryq-Qazyna Trast» qorynyń qoldauymen «Meıírímdílík» úıí qorynyń ūıymdastyruymen júzege asyp otyr.
Professordyń sózínshe, Qazaqstanda kompartment sındromy (qysylu sındromy) kezdesetín nauqastar az emes. Būl jaǵdaıda qatty ísínu paıda bolyp, tínderdegí qysym joǵarylaıdy. Sonyń saldarynan qan tamyrlary men júıkeler qysylyp, būlshyq etter men júıkelerdíń íshínara nemese tolyq jansyzdanuyna ákeluí múmkín. Al būl óz kezegínde múgedektíkke soqtyrady.
Mūndaı jaǵdaı kóbíne synyqshylardyń alǵashqy kómektí dūrys kómek kórsetpeuínen tuyndaıdy.
Igor Golubev balalardyń súıegí synǵan kezde uaqytyly ota jasaudyń mańyzy óte joǵary ekenín atap óttí. Onyń aıtuynsha, mūndaı jaǵdaıda balalarǵa alǵashqy kómektí synyqshylar emes, kásíbı dárígerler kórsetuge tıís.
Būl jaǵdaıda qysymdy azaıtu úshín qan tamyrlary men júıkení bosatatyn fastsıotomıya, yaǵnı arnaıy hırurgıyalyq tílík jasalady. Mūndaı ota jaraqat alǵannan keıíngí alǵashqy 6 saǵat íshínde jasaluy qajet.