Almatyda buqaralyq sportty damytýǵa, aýla bastamalaryn qoldaýǵa, qala turǵyndaryn sport pen belsendi ómir saltyna keńinen tartýǵa baǵyttalǵan «Sport – Dostyq alańy» qalalyq jobasyn júzege asyrý jalǵasyp jatyr.
Joba túrli alańdy qamtyp, fleshmob, týrnır, otbasylyq jarys pen áleýmettik-sporttyq is-sharalardy biriktiredi. Bul týraly Almaty qalasynyń Sport basqarmasynyń ókilderi aıtty, - dep habarlaıdy Aqshamnews.kz.
Ótken demalys kúnderi is-shara birneshe aýdanda bir ýaqytta uıymdastyryldy. Medeý aýdanynda joba aıasynda jáne «Taza Qazaqstan» respýblıkalyq aksıasymen birlesip iri sporttyq fleshmob ótti. Jastar, oqýshylar, stýdentter, ardagerler men eriktiler – jalpy sany 700-den astam qala turǵyny sporttyq oıyndarǵa, bı fleshmobtaryna jáne belsendi baǵdarlamaǵa qatysyp, is-shara erekshe atmosferada ótti.
Almaly aýdanynda 1986 jylǵy Jeltoqsan oqıǵasyna qatysqandar arasynda voleıbol týrnıri ótti. Bes komanda emosıaǵa toly kezdesý ótkizip, jeńimpazdarǵa kýbok, medal jáne alǵys hat tabys etildi. Uıymdastyrýshylardyń aıtýynsha, mundaı kezdesýler urpaq sabaqtastyǵyn nyǵaıtyp, jastardyń sportqa degen jyly shyraıyn qalyptastyrady.
Táýelsizdik kúni qarsańynda Gandı atyndaǵy saıabaqta otbasylyq sport estafetasy ótti. Ata-analar men balalar bir komanda bolyp óner kórsetip, uıymshyldyq pen komandalyq rýh tanytty. Jarysta Asqarovtar otbasy jeńimpaz atandy. Barlyq qatysýshyǵa alǵys hat pen estelik syılyq berildi.
Áýezov aýdanynda asyq atý, darts, shahmat, arqan tartys jáne voleıbol oıyndaryn qamtyǵan keń kólemdi spartakıada uıymdastyryldy. İs-shara turǵyndar arasyndaǵy dostyqty nyǵaıtyp, jaǵymdy sporttyq kóńil-kúı qalyptastyrýǵa yqpal etti.
Alataý aýdanynyń, Nurkent shaǵynaýdanynda ashyq fýtbol jattyǵýy ótti. Kásibı jattyqtyrýshylar fleshmob ótkizip, oıyn elementterin úıretip, komandalyq tapsyrmalar uıymdastyrdy. Bul jasóspirimderdi belsendi demalys pen salaýatty ómir saltyna tartýǵa múmkindik berdi.
«Sport – Dostyq alańy» jobasy ár aýdan turǵyndaryn biriktirip, ýaqytty tıimdi ótkizýge, dene shynyqtyrýǵa jáne sporttyq mádenıetti qalyptastyrýǵa jaǵdaı jasaıdy. Baǵdarlama jas almatylyqtardyń boıyna senimdilik, tártip, shydamdylyq jáne dástúrge qurmet sezimin darytady», – dedi qalalyq Sport basqarmasynyń ókilderi.