Qala boıynsha ortasha aılyq jalaqy respublıkalyq deńgeıden 16,3%-ǵa joǵary bolyp tūr.
Almaty ákímíníń orynbasary Ílıyas Óserov Óńírlík kommunıkatsıyalar qyzmetíníń onlaın baspasóz-konferentsıyasynda ShOB qoldau men qala tūrǵyndaryn jūmyspen qamtu sharalary turaly aıtty, dep habarlaıdy Almaty-akshamy.kz.
Ílıyas Óserovtíń málímetterí boıynsha, aǵymdaǵy jyldyń 1 mausymyna Almatyda 31 myń jūmys orny ashyldy. Būl rette qala boıynsha ortasha aılyq jalaqy respublıkalyq deńgeıden 16,3%-ǵa joǵary jáne jyl saıyn ósude.
Aǵymdaǵy jyly ShOB jeńíldíkpen nesıelendíru qūraldary keńeıdí, būl qala tūrǵyndarynyń jūmyspen qamtyluyna oń áserín tıgízdí. Nesıení jeńíldík sharttarmen qaıta qarjylandyru, sondaı-aq nesıeler boıynsha merzímín ūzartu múmkíndígí beríldí. Zardap shekken salalar úshín salyqtyq yntalandyru sharalary qabyldandy.
Qoldau baǵdarlamalarynyń arqasynda shaǵyn jáne orta kásípkerlíktíń jūmys jasaıtyn subektíleríníń sany shamamen 1%-ǵa óstí.
2020 jyly 74 myńnan astam kásípker salyqtyq jeńíldíkterge ıe boldy. Zardap shekken salalardyń 3 myń qaryz alushylarynyń nesıelerí keıínge qaldyryldy, 300-den astam kásípker kommunaldyq menshík nysandarynda jaldau aqylaryn tóleuden bosatyldy. Arzan mólsherleme boıynsha kásípkerlerdíń 1 myńnan astam jobalary qarjylandyryldy.
«Kásípkerlerdíń tıímdí jūmys ísteuí úshín bíz naryqqa qatysushylar arasynda ózara tıímdí jáne ūzaq merzímdí ekonomıkalyq qarym-qatynasty qalyptastyru úshín jaǵdaı jasaımyz», - dep habarlady Ílıyas Óserov.
Máselen, Almaty bankterí 3 trln teńgeden astam nesıe berdí. Onyń íshínde 643,9 mlrd teńgení shaǵyn kásípkerlík úshín nesıeler qūrady. Jalpy, jyl basynan berí shaǵyn bıznestí nesıeleu 2,6 ese óstí.
«Joǵary tabysty jūmys oryndaryn qūru úshín bíz ekonomıkada qūrylymdyq manevr jasauǵa kírístík. Būl qūrylymdyq manevr basym salalardy damytu kórínís tapqan Almaty-2050 Strategıyasynda qarastyrylǵan. Turızm, tsıfrlandyru, kreatıvtí ekonomıka salalary damudyń basty salalary bolyp belgílendí», - dep atap óttí Ílıyas Óserov.