Almaty qalasyndaǵy 28 gvardıyashy-panfılovshylar parkínde Bauyrjan Momyshūlynyń eskertkíshíne saltanatty túrde gúl qoyu rásímí óttí.
Ís-sharaǵa dańqty qolbasshynyń tuystary, áskerı qyzmetkerler, zıyaly qauym ókílderí, ŪQK Shekara akademıyasynyń kursanttary jáne qala tūrǵyndary qatysty. Saltanatty jıyn barysynda batyr ruhyna bír mınut únsízdík jarıyalandy.
Rásímge qatysqan Bauyrjan Momyshūly áuletíníń múshesí Zeınep Ahmetova jyly estelíkterímen bólístí.
— Marqūm atam bír kezde: «Men ólgennen keıín de tírílerdíń arasynda ómír súretín bolamyn», — dep aıtqan edí. Ol kezde jas boldym, būl sózdíń mánín tolyq túsíne bermedím. Al qazír aınalama qarasam, rasynda da solaı ekenín kóríp otyrmyn. Búkíl Qazaqstan atama «Halyq Qaharmany» ataǵy berílgeníne quanyp jatyr. Demek, ol sózder shyn mánínde kóregendíkpen aıtylǵan. Ol rasymen de tírílerdíń arasynda ómír súríp keledí, — dedí Zeınep Ahmetova.
Sharaǵa Qazaqstannyń Eńbek Erí, pedagogıka salasynyń ardagerí, Almaty qalasynyń Qūrmettí azamaty Ayagúl Mırazova da qatysty.
— Memleket basshysy Qasym-Jomart Toqaevtyń Bauyrjan Momyshūlyna «Halyq Qaharmany» ataǵyn beruí búkíl el úshín úlken quanysh boldy. Halyq ony būrynnan batyr dep tanyǵan. Al resmı túrde, qūjat júzínde moıyndaluy — asa mańyzdy árí tarıhı oqıǵa. Bauyrjan Momyshūlynyń eńbegí tek elímízde ǵana emes, shetelderde de joǵary baǵalanady, onyń áskerı taktıkasy álí kúnge deıín zerttelíp keledí. Onyń artynda tek áskerı emes, tárbıelík mūra da qaldy. Men pedagog retínde, 50 jyl ūstazdyq etken adam retínde aıtarym: onyń ūlttyq qūndylyqtarǵa kózqarasy, tárbıelík ūstanymy — bíregeı. Sondyqtan Bauyrjan Momyshūlynyń árbír sózí men ósıetí mektep baǵdarlamasyna enuí kerek. Óıtkení ósíp kele jatqan ūrpaq úshín onyń ónegesí aıryqsha mańyzǵa ıe, — dedí Ayagúl Mırazova.
Jıynǵa akademık, Qazaqstan ǵalymdar odaǵynyń prezıdentí, Memlekettík syılyqtyń laureaty Orazaly Sabden de qatysyp, Bauyrjan Momyshūlyna «Halyq Qaharmany» ataǵynyń beríluín ūlttyq ruhty kóteretín mańyzdy oqıǵa retínde baǵalady.
— Búgín — shyn mánínde aıtuly kún. Keshe ǵana búkíl Qazaqstan Prezıdent Jarlyǵymen álemge tanymal batyr Bauyrjan Momyshūlyna «Halyq Qaharmany» ataǵy berílgeníne kuá boldy. Halyq «būl ataq 80 jyl būryn beríluí kerek edí» dep aıtyp júr. Degenmen, kesh bolsa da, onyń beríluí eldíń júregíne jylu ūyalatty. Qazír jastardy qalaı tárbıeleu kerek degen másele erekshe ózektí. Dál osy kezeńde Bauyrjan Momyshūlyn qaıta tanyp, onyń mūrasyna jańasha kózqaraspen qarau qajet. Eger halqymyzǵa zor serpín bergen ekí tūlǵany aıtar bolsaq, bírí — Abaı, ekínshísí — Bauyrjan Momyshūly. Abaı «jyly júrek, qaıratty erík, nūrly aqyl» dep kemel adamdy sıpattasa, Bauyrjan sol qasıetterdí erlík jolyna baǵyttaı bíldí. Qazír elímízdíń túkpír-túkpírínde Bauyrjan Momyshūlynyń 115 jyldyǵy atalyp ótude. Ideologıyany syrttan ízdeudíń qajetí joq. Bízdíń ıdeologıyamyz — Abaı men Bauyrjan. Osy ekí ūly tūlǵanyń danalyǵy men erlígín ūshtastyra bílsek, qazaq halqy bıík belesterge kóteríledí, — dep túıíndedí Orazaly Sabden.
Resmı bólím ayaqtalǵan soń ŪQK Shekara akademıyasynyń kursanttary Bauyrjan Momyshūlynyń eskertkíshí aldynda sap túzep ótíp, batyrǵa áskerı qūrmet kórsettí.