Sot úkimimen burynǵy basshy qyzmet babyn asyra paıdalanǵany úshin kináli dep tanyldy.
Maýsymnyń 7-si kúni Almaty qalasy Medeý aýdanynyń N2 aýdandyq soty «Balbulaq» balalardy ońaltý ortalyǵynyń eks-dırektoryna qatysty qylmystyq is boıynsha úkim shyǵardy, dep habarlaıdy Almaty-akshamy.kz QazAqparat caıtyna silteme jasap.
Sot anyqtaǵandaı, 2020 jyldyń 30 jeltoqsanynda burynǵy dırektordyń tóraǵalyǵymen ótken komısıa otyrysynda osy mekemeniń 22 qyzmetkerine syıaqy retinde 2 331 169 teńge kóleminde qarajat bólý týraly sheshim qabyldandy.
«2020 jyldyń 31 jeltoqsanynda A. esepshilerine jalpy somasy 939 000 teńgeni quraıtyn syıaqyny jınap, ózine berýdi tapsyrdy. Osylaısha, sot A.-nyń óz paıdasy úshin qyzmettik ókilettigin asyra paıdalanǵany, bul memlekettiń zańmen qorǵalatyn quqyqtary men múddelerine eleýli zıan keltirýge ákep soqtyrǵanyn anyqtady, ıaǵnı ol Qazaqstan Respýblıkasy Qylmystyq kodeksiniń 361-babynyń 1-bóligi boıynsha qylmystyq quqyq buzýshylyq jasady», - dep habarlady sottyń baspasóz qyzmeti.
Prokýror oǵan 1000 AEK kóleminde aıyppul salýdy surady (2 917 000 teńge).
Sotta túsindirip ótilgendeı, Qylmystyq kodekstiń 361-babynyń 1-bóliginiń sanksıasy 2000 AEK-ke deıin aıyppul túrin nemese sol mólsherde túzeý jumystaryna jegýdi nemese 600 saǵatqa deıin qoǵamdyq jumystarǵa tartý túrinde jazalaýdy kózdeıdi. Ne bolmasa eki jylǵa deıin bas bostandyǵyn shekteý nemese múlkin tárkilep, belgili bir laýazymdardy atqarý quqyǵynan ómir boıyna aıyra otyryp, sol merzimge bas bostandyǵynan aıyrýdy qarastyrady.
Sot úkimimen burynǵy basshy qyzmet babyn asyra paıdalanǵany úshin kináli dep tanyldy.
«Sot sottalýshy keltirilgen zalaldy tolyq kólemde ótegenin, birinshi ret qylmystyq jaýapkershilikke tartylǵanyn, óziniń kinásin tolyq moıyndap, jasaǵan isine ókingenin eskerdi. Sonymen birge, aýyrlatatyn mán-jaılar keltirilgen joq. Osyǵan baılanysty, A.-ǵa memlekettik qyzmette, qarjy uıymdarynda, memlekettik uıymdarda jáne kvazımemlekettik sektor sýbektilerinde laýazymdardy atqarý quqyǵynan ómir boıyna aıyra otyryp, bir jyl merzimge bas bostandyǵyn shekteý jazasy taǵaıyndaldy»,- dep habarlady sottan.
Sot úkimi zańdy kúshine engen joq.