2026 jyldyń alǵashqy jartyjyldyǵynda Almatyda memlekettík organdar tarapynan júrgízílgen 270 zańsyz tekseru anyqtaldy. Onyń 216-sy jeke kásípkerlík subektíleríne qatysty bolǵan, – dep habarlaıdy aqshamnews.kz tílshísí.
Bıznestí negízsíz tekserulerden qorǵauda Tekseru subektílerí men obektíleríníń bíryńǵaı tízílímí mańyzdy ról atqarady. Aqparattyq júıede memlekettík baqylau nysandary turaly málímetter qamtylyp, tekseru aktílerí elektrondy túrde tírkeledí. Būl memlekettík baqylau men qadaǵalaudyń ashyqtyǵyn qamtamasyz etíp, zańsyz tekserulerdíń aldyn aluǵa múmkíndík beredí.
Zań talaptaryna sáıkes, profılaktıkalyq baqylau nemese tekseru bastalǵanǵa deıín tıístí akt tekseríletín subektíníń nemese nysannyń ornalasqan mekenjaıy boıynsha uákílettí organda tírkeluge tıís.
«2026 jyldyń alǵashqy alty aıynda Almaty qalasy boıynsha 9 812 tekseru taǵaıyndau aktísí tírkeldí. Onyń 6 710-y jeke kásípkerlík subektíleríne qatysty. Qadaǵalau nátıjesínde 270 zańsyz tekseru anyqtaldy. Onyń íshínde 255 tekseru qūqyqtyq statıstıka jáne arnaıy esepke alu organdarynda tírkelmeı, al 15 tekseru belgílengen tártíptí būza otyryp júrgízílgen», – dedí QR Bas prokuraturasy Qūqyqtyq statıstıka jáne arnaıy esepke alu jóníndegí komıtetíníń Almaty qalasy boıynsha departamentíníń bólím prokurory Bolathan Elaman Ardaqūly.
Onyń aıtuynsha, zańsyz tekserulerdíń 216-sy bıznes subektíleríne qatysty bolǵan. Atap aıtqanda, tírkeusíz júrgízílgen tekserulerdíń 203-í, al belgílengen tártíp būzylǵan tekserulerdíń 13-í jeke kásípkerlerge qatysty.
«Bıznes subektílerín baqylaushy organdardyń zańsyz aralasuynan qorǵau maqsatynda departament 32 jaǵdaıda tekseru taǵaıyndau aktísín tírkeuden bas tartty», – dedí Bolathan Elaman Ardaqūly.
Kásípkerler ózderíne qatysty tekserudíń zańdy túrde tírkelgenín qamqor.gov.kz aqparattyq portaly nemese Qamqor mobıldí qosymshasy arqyly teksere alady. Sondaı-aq qosymshada aldaǵy tekseruler turaly habarlamalar qoljetímdí.
Qamqor mobıldí qosymshasyn App Store jáne Google Play dúkenderínen júkteuge bolady.