Óńírlík kommunıkatsıyalar qyzmetínde Alǵys aıtu kúníne, onyń qūndylyqtary men qala tūrǵyndarynyń oǵan atsalysuyna arnalǵan baspasóz konferentsıyasy bolyp óttí, – dep habarlaıdy aqshamnews.kz tílshísí.
Almatydaǵy «Qazaqstandyq orys mádenı ortalyǵy» qoǵamdyq bírlestígíníń tóraǵasy, Qazaqstan halqy Assambleyasy Aqsaqaldar keńesíníń múshesí Vsevolod Lukashev merekeníń mání, tarıhı mańyzy men kelísímdí nyǵaıtudaǵy rólí turaly aıtyp berdí.
Alǵys aıtu kúní 10 jyl būryn Qazaqstan halqy Assambleyasynyń qūrylǵan kúníne oraılastyrylyp bekítílgen. Spıkerdíń aıtuynsha, būl mereke táuelsíz memlekettíń qalyptasu kezeńímen jáne qıyn jyldary beıbítshílík pen tūraqtylyqty, ūltaralyq kelísímdí saqtauda sheshushí ról atqarǵan Assambleyamen tíkeleı baılanysty. Alǵys aıtu kúní qazír eń aldymen jastarǵa baǵyttalǵan úndeu retínde qarastyrylyp, el bolashaǵyn ózara qūrmet pen rızashylyq arqyly qūrudyń mańyzyn kórsetedí.
«Būl mereke 10 jyl būryn bekítílíp, Qazaqstan halqy Assambleyasynyń qūrylǵan kúníne arnaldy. Dál osy qūrylym qazírgí Qazaqstannyń qalyptasuyndaǵy eń kúrdelí kezeńderde beıbítshílík pen tūraqtylyqty, ūltaralyq kelísímdí saqtauǵa atsalysty. Alǵys aıtu kúníníń negízgí audıtorıyasy — árıne, jastar», — dep atap óttí Vsevolod Lukashev.
Merekeníń fılosofıyasy da ár adamǵa túsíníktí árí qarapaıym ekenín aıtty. Ol qasyńdaǵy adamdarǵa jáne eldíń ortaq ıgílígíne kún saıyn úles qosyp júrgen jandarǵa alǵys aıta bílu. Onyń sózínshe, būl — úırenshíktí nárselerge jańasha qarap, beıbítshílík pen tūraqtylyqtyń ózdígínen kelmeıtínín ūǵynuǵa múmkíndík beredí.
«Būl egemen Qazaqstandy bírge qūryp jatqanymyz úshín kórshíńe alǵys aıtuǵa sebep. Ata-anaǵa — tárbıe men bílím bergení úshín, dárígerge — densaulyqty saqtaǵany úshín, qūtqarushylar men polıtsıya qyzmetkerleríne — tynyshtyǵymyz úshín alǵys bíldíru. Bízge kóbíne bárí ózdígínen bolyp jatqandaı bolyp kórínedí, bíraq ár nárseníń artynda adam tūr», — deıdí.
Sonymen qatar, Vsevolod Lukashev qazaq halqy men elímízde tūratyn barlyq etnosqa degen tarıhı alǵystyń mańyzyn erekshe atap óttí. Onyń aıtuynsha, ózara qūrmet pen qoldau Qazaqstannyń tūraqty damuynyń negízíne aınaldy.
«Būl qonys audaru kezeńínde túrlí etnostardy qabyldaǵan qazaq halqyna, sondaı-aq ūzaq jyldar boıy ıyq tírese ómír súríp kele jatqan barlyq halyqtarǵa degen alǵys. Bíz 35 jyl boıy bírge egemen Qazaqstandy qūryp kelemíz jáne beıbítshílík pen kelísímníń arqasynda eldíń qalaı damyp jatqanyn kóríp otyrmyz. Alǵys aıtu kúní — jastarǵa bolashaqty qalaı qūru kerek ekendígín kórsetetín úlgí», — dep túıíndedí ol.
Spıkerdíń aıtuynsha, osyndaı merekeler arqyly alǵys aıtu mádenıetí qalyptasady. Būl mádenıet qoǵamdyq kelísímdí nyǵaıtyp, elímízdíń eń basty jetístígí — beıbítshílík pen tūraqtylyqty saqtauǵa kómektesedí.
