«Almaty» áleumettík-kásípkerlík korporatsıyasy áleumettík baǵyttaǵy kásípkerlíktí damytu maqsatynda 31 kásípkerge bıznesterín keńeıtu úshín kommertsıyalyq maqsattaǵy nysandar ūsyndy, dep habarlaıdy Aqshamnews.kz tílshísí.
Nysandar jeńíldetílgen sharttarmen jalǵa beríldí. Jaldau qūny bír sharshy metríne 0,1 AEK-tí nemese 2026 jylǵa belgílengen mólsherge sáıkes 432,5 teńge. Būl naryqtyq baǵadan aıtarlyqtaı tómen.
Kommertsıyalyq nysandar «Almaty» ÁKK resmı saıtynda jarıyalanatyn ashyq baıqau arqyly, qolaıly oryndar paıda bolǵan saıyn ūsynylady. Baıqauǵa áleumettík kásípkerlík salasynda jūmys ísteıtín kásípkerler qatysa alady. Inklyuzıya, densaulyq saqtau jáne bílím beru baǵytyndaǵy jobalarǵa basymdyq beríledí.
Baıqau jeńímpazymen jaldau sharty úsh jylǵa deıíngí merzímge, ūzartu múmkíndígímen jáne satyp alu qūqyǵynsyz rásímdeledí. Sonymen qatar, úsh aıǵa deıín jaldau aqysy alynbaıtyn jeńíldík kezeńí qarastyrylǵan.
Osy tetík ayasynda erekshe qajettílígí bar jandarǵa arnalǵan beıímdeu jáne ońaltu ortalyqtary ashylyp, erekshe bílím beru qajettílígí bar balalarǵa logopedıyalyq, defektologıyalyq, sensorlyq jáne neıropsıhologıyalyq baǵyttaǵy sabaqtar ūıymdastyrylǵan. Sondaı-aq, áıelderge, jasóspírímderge jáne zeınet jasyndaǵy azamattarǵa arnalǵan shyǵarmashylyq sheberhanalar men úıírmeler jūmys ístep tūr.
Mūndaı jobalardy qoldau tūraqty jūmys oryndaryn ashuǵa jáne áleumettík osal toptardy ekonomıkalyq belsendílíkke tartuǵa yqpal etíp otyr. Máselen, jobalardyń bírí ayasynda tígín óndírísí íske qosylyp, áleumettík osal toptaǵy áıelder jūmyspen qamtyldy. Būl olardyń áleumettík beıímdeluíne jáne tabysyn arttyruǵa múmkíndík berdí.
Atalǵan áríptestík nátıjesínde «Almaty» ÁKK men áleumettík kásípkerlerdíń seríktestígí arqyly qalada jalpy sany 217 jańa jūmys orny ashyldy.
