Shanhaıda Qazaqstan Prezıdentí Qasym-Jomart Toqaevtyń qatysuymen ótken bıznes-forum ayasynda Almaty ákímdígí, Nero Robotics kompanıyasy jáne UBTECH Robotics kompanıyasynyń negízín qalaushy Chjou Tszyan arasynda Almatyda gumanoıdty jáne bílím beru robottaryn shyǵaratyn zauyt salu jóníndegí kelísímge qol qoıyldy, – dep habarlaıdy aqshamnews.kz tílshísí.
UBTECH – robototehnıka salasyndaǵy álemdík kóshbasshylardyń bírí. Kompanıyanyń naryqtyq kapıtalızatsıyasy shamamen 6 mlrd AQSh dollaryna jetedí. Onyń robottary álemníń kóptegen elíndegí ónerkásíptík kásíporyndar men bílím beru ūıymdarynda keńínen qoldanylady.
Almaty kompanıyanyń sheteldegí alǵashqy óndírístík jobasyn júzege asyratyn oryn retínde tańdaldy. Qazírgí uaqytta gumanoıdty jáne bílím beru robottaryn shyǵaratyn zauyttyń qūrylysy bastaldy. Óndírístí 2027 jyldyń bírínshí toqsanynda íske qosu josparlanyp otyr.
Joba ayasynda óndírís ornymen qatar ınjenerlík-zertteu ortalyǵy ashylyp, zamanauı tehnologıya engízíledí. Sondaı-aq, qazaqstandyq mamandardy robototehnıka salasynda dayarlau kózdelgen.
Jobany júzege asyru jańa ınvestıtsıya tartuǵa, joǵary tehnologıyalyq jūmys oryndaryn ashuǵa jáne Almatynyń ınnovatsıya men ozyq tehnologıyalar ortalyǵy retíndegí áleuetín odan árí nyǵaıtuǵa múmkíndík beredí.