Kítapta basqaru ísínde tuyndaıtyn kóptegen ózektí máselelerge jauap berílgen jáne mańyzdy sheshímder qabyldauda senímdí baǵdar bola alady, dep habarlaıdy aqshamnews.kz tílshísí.
Almatyda Qazaqstan Respublıkasynyń Prezıdentí Qasym-Jomart Toqaevtyń «Ádílettí qoǵamǵa – shynshyl sóz» atty jańa kítabyn talqylauǵa arnalǵan dóńgelek ústel óttí. Ís-shara Dostyq úıínde ūıymdastyrylyp, oǵan ǵylym, ádebıet jáne memlekettík qyzmet salalarynyń kórnektí ókílderí qatysty.
Saraptamalyq kezdesudí Almaty qalasy ákímíníń orynbasary, sayası ǵylymdar kandıdaty Abzal Núkenov júrgízdí. Jıyndy ashqan ol Prezıdent eńbegíníń aıryqsha qūndylyǵyna toqtalyp, Memleket basshysynyń íshkí jáne syrtqy sayasat salasyndaǵy tereń tájírıbesí kítapta bayandalǵan árbír tūjyrymǵa erekshe salmaq beretínín atap óttí. Ákím orynbasarynyń aıtuynsha, kítapta basqaru ísínde tuyndaıtyn kóptegen ózektí máselelerge jauap berílgen jáne mańyzdy sheshímder qabyldauda senímdí baǵdar bola alady. Sondaı-aq ol būl eńbektí zerdeleu memlekettík reformalardyń logıkasy men eldíń tarıhı damu jolyn tereńírek túsínuge múmkíndík beretínín atap óttí.
Sózíníń sońynda ákím orynbasary negízgí oıdy bylaısha túıíndedí:
– Būl sózderdí kítap betteríndegí mátín kúıínde ǵana qaldyrmauymyz kerek dep esepteımín. Olardy túrlí salalarda ís júzínde qoldanu mańyzdy. Būl oılar barlyq jastaǵy adamdarǵa, ásírese jastarymyz ben mamandarymyzǵa baǵdar bola alady. Sondaı-aq atalǵan eńbektíń joǵary qoldanbalyq mańyzyn, ony tájírıbede qoldanudyń erekshe qūndylyǵyn atap ótken jón.
Talqylaudy belgílí memleket jáne qoǵam qaıratkerí, Qazaqstan Jazushylar odaǵynyń múshesí Nūrlan Orazalın jalǵastyrdy. Ol óz sózínde sayası kóshbasshynyń halyq taǵdyry men qoǵamǵa degen kózqarasynyń qalyptasuy men evolyutsıyasy turaly oı-píkírlerímen bólísíp, mūraǵattarda saqtalǵan tarıhı oqıǵalardy da eske aldy.
– Kítaptan bolashaq el kóshbasshysynyń tálímgerlík pen ótken jyldardaǵy oqıǵalar arqyly qatań qaǵıdattar men tarıhı tájírıbení boıyna síńírgenín kóruge bolady. Būl úderís onyń Qytaıdaǵy qyzmet etken kezínen bastau alady. 1995 jyly «Egemen Qazaqstan» gazetínde redaktor bolyp jūmys ístegen kezímdí eske ala otyryp, Qasym-Jomart Toqaevtyń jauapkershílígíníń joǵary bolǵanyn atap ótkím keledí. Demokratıya qalyptasyp jatqan kezeńde Syrtqy íster mınıstrí qyzmetíne kelgen ol meníń ótíníshíme bírden qūlaq asyp, gazetímízge arnalǵan baǵdarlamalyq maqalany jedel daıyndap bergen edí, – dep estelígímen bólístí Nūrlan Orazalın.
Dóńgelek ústel ayasyndaǵy píkírtalasta kezdesuge qatysqan basqa da bedeldí tūlǵalar sóz sóıledí. Olardyń qatarynda akademık Zeınep Bazarbaeva, Qazaqstandaǵy PEN-klub prezıdentí Bıgeldí Ǵabdullın, Ahmet Baıtūrsynūly atyndaǵy Tíl bílímí ınstıtutynyń dırektory Anar Fazyljan jáne basqa da sarapshylar boldy.
Eske salaıyq, 5 tamyzda Memleket basshysynyń 1994 jyldan búgíngí kúnge deıíngí sóılegen sózderí, bayandamalary men oı-tolǵaulary qamtylǵan auqymdy jınaq jaryq kórdí. Kítap 21 bólímnen tūrady. Onda memlekettík basqaru, zań ústemdígí, tsıfrlandyru, jastar sayasaty, ekologıya jáne «Taza Qazaqstan» bastamasy sıyaqty mańyzdy taqyryptar qamtylǵan. Eńbek qazírgí Qazaqstan tarıhyna qyzyǵushylyq tanytatyn qalyń oqyrmanǵa arnalǵan.