Óńírlík kommunıkatsıyalar qyzmetínde Qazaqstan Respublıkasy Básekelestíktí qorǵau jáne damytu agenttígíníń Almatydaǵy departamentíníń byltyrǵy jūmysyn qorytyndylaǵan baspasóz konferentsıyasy bolyp óttí. Onda departament basshysy Nūrjan Nūrlanūly basty jetístíktí, anyqtalǵan zań būzushylyqtar men adal básekelestíktíń qalaı damyp jatqanyn bayandady. Jıynda tūtynushy men kásípkerdíń qūqyǵyn qorǵauǵa, tauar narqyndaǵy zań būzushylyqty tómendetuge kóp kóńíl bólíngení aıtyldy.
Spıkerdíń aıtuynsha, monopolıyaǵa qarsy organnyń negízgí míndetí — básekelestíktí damytuǵa járdemdesu, zań būzushylyqtyń aldyn alu men olardyń der kezínde jolyn kesu eken. Osy maqsatta departament tauar naryqtaryna taldau júrgízedí, habarlamalar men nūsqamalar shyǵarady, tergep-tekseredí, qajet bolǵan jaǵdaıda sotqa júgínedí, sondaı-aq memlekettík kásíporyndardy qūryp, olardyń qyzmetín de kelísedí.
«Bízdíń jūmysymyz zań būzushylyqty anyqtau ǵana emes, onyń aldyn aluǵa da baǵyttalǵan. Bíz naryqty taldap, básekelestík deńgeıín baǵalaımyz, bıznes pen tūtynushylar úshín qoljetímdílíktíń shektelu qaupín aldyn ala baıqasaq, der kezínde áreket etemíz. Mūndaı tásíl naryqtyq ortany júıelí túrde sauyqtyruǵa múmkíndík beredí», — deıdí Nūrjan Nūrlanūly.
2025 jyly departament Almatynyń narqyndaǵy básekelestíkke 14 ret taldau jasady. Olardyń qatarynda avıatsıyalyq otyndy kóterme jáne bólshek saudada ótkízu, tūrǵyn úıdí bastapqy satu, sondaı-aq elektr energıyasyn kóterme saudada ótkízu naryqtary bar. Júrgízílgen jūmystyń qorytyndysy boıynsha 23 habarlama men 6 nūsqama engízíldí, 16 tergep-tekseru ayaqtalyp, 16 ákímshílík qūqyq būzushylyq turaly ís qozǵaldy. Salynǵan jáne óndírílgen aıyppūldyń jalpy somasy 4,6 mlrd teńgeden asty. Negízgí den qoyu sharalary ústem nemese monopolıyalyq jaǵdaıdy terís paıdalanu faktílerí boıynsha qabyldandy. Barlyǵy 9 jaǵdaı tírkeldí.
Baspasóz konferentsıyasy barysynda Nūrjan Nūrlanūly departamenttíń zań men sot rásímderí sheńberínde qatań áreket etetínín atap ótíp, mysal keltírdí. Atap aıtqanda, tūtynushylardyń ótíníshímen «Alseko» kompanıyasynyń kommunaldyq qyzmetter úshín shot-túbírtek qalyptastyru qyzmetí qaraldy. Tergeu qorytyndysy boıynsha qūqyqtyq ūstanym qalyptasyp, ol bírínshí satydaǵy sotta qoldau tapqan. Būl ístí sotta álí talqylap jatyr.
«Bíz úshín tūrǵyndar men bıznestíń múddesín qorǵau asa mańyzdy. Eger sot bízdíń ūstanymdy túpkílíktí qoldasa, būl qaladaǵy barlyq tūtynushynyń qūqyǵyn qorǵauǵa múmkíndík beredí. Bíz barynsha ūqypty árí tek qūqyqtyq alańnyń sheńberínde áreket etemíz», — dep atap óttí departament basshysy.
Sondaı-aq elektr energıyasy, áue tasymaly, zerthanalyq qyzmet pen jylumen jabdyqtauǵa qatysty máseleler de qaraldy. Keıbír jaǵdaıda departament kásípkerlerge qosymsha qarjylyq júkteme túsíruí nemese tūtynushylardyń qūqyqtaryn shekteuí múmkín sharttardy anyqtady. Bíraz kompanıyaǵa habarlama joldanyp, keıbír zań būzushylyqtar sotqa deıíngí tártíppen joıyldy, ózge epızodtar boıynsha tergep-tekseríp jatyr.
Qabyldanǵan ís-sharalar Almaty tūrǵyndary úshín jylu energıyasyna qaıta qosylu qūnyn tómendetuge múmkíndík beríp, tarıf qūramynan paıda alynyp tastaldy. Sonymen qatar zerthanalyq qyzmetter naryǵyndaǵy shart talaby túzetílíp, adal básekelestíkke qosymsha múmkíndík jasaldy.
«Monopolıyaǵa qarsy retteu — būl múddeler teńgerímí, ashyq oıyn erejelerí jáne naryqtyń barlyq ókílí úshín teń jaǵdaı jasau degen sóz. Bízdíń maqsatymyz — bıznes te, tūtynushy da ózíníń qorǵalǵanyn sezíníp, júıege barynsha sením artuy», — dep túıíndedí sózín Nūrjan Nūrlanūly.
Departamentte Almatyda básekelestíktí damytu men tūtynushylardyń qūqyqtaryn qorǵau boıynsha jūmys naryqtardy taldau, sot tájírıbesí men azamattardyń ótíníshterí negízínde jalǵasatyny atap ótíldí.
