Erjan Babaqūmarov Abaı Qūnanbaev eskertkíshíne gúl shoqtaryn qoyu rásímíne qatysty
Ūly aqyn, fılosof, aǵartushy Abaı Qūnanbaıūlynyń tuǵan kúní – Abaı kúní atalyp óttí. Osyǵan oraı Respublıka saraıy aldyndaǵy Abaı eskertkíshíne gúl shoǵy qoıyldy.
Atalmysh sharaǵa Almaty qalasy ákímíníń orynbasary Erjan Babaqūmarov, qalalyq ardagerler keńesíníń tóraǵasy Ahan Bıjanov, Qazaqstan Jazushylar Odaǵy basqarmasynyń tóraǵasy, aqyn Ūlyqbek Esdáulet, Almaty qalasy Mádenıet basqarmasynyń basshysy Ǵanı Maılybaev qatysyp, qūttyqtau sózderín aıtty.
Bıyl Qazaqstanda Abaı Qūnanbaevtyń tuǵanyna 176 jyl jáne QR Táuelsízdígíníń 30 jyldyǵy atap ótíledí. Qala ákímíníń orynbasary Erjan Babaqūmarov Abaıdyń baǵa jetpes mūrasy qazaqtyń ūlttyq mádenıetíne zor yqpal etkenín atap óttí. Onyń eńbekterí búgíngí kúnge deıín shaharymyzdyń, búkíl eldíń qoǵamdyq jáne mádenı ómíríníń baǵyttaryn aıqyndap otyr.
Osyǵan deıín ūly aqynnyń naqty qaı kúní dúnıe esígín ashqany jaıly bíraz kereǵar píkírler oryn alǵan. Onyń sebebí, aqyn eskí kúntízbe boıynsha 29 shílde kúní, jańa kúntízbe boıynsha 10 tamyz kúní tuǵan bolatyn. Bír jyl būryn ǵana Qazaqstan Jazushylar Odaǵy osy dau-damaıdyń núktesín qoıyp, úkímetke ūsynys bíldírgen. Nátıjesínde 10 tamyz - Abaı kúní atalyp, búkílhalyqtyq merekege aınalyp otyr.
«Resmı moıyndalǵan mereke bolǵandyqtan, qazír qaı qala, oblys ortalyǵy bolmasyn, bar jerde Abaı eskertkíshí aldyna gúl shoǵy qoıylyp, mereke atalyp ótíp jatyr. Barlyq ǵylym men bílím, mádenıet oshaqtarynda Abaıǵa qatysty ís-sharalar júrgízílude. Abaı – tūńǵıyq tereń qūbylys. Ony bíz tolyqqandy zerttedík dep aıta almaımyz, bíraq byltyrdan berí osy baǵytta bíraz auqymdy jūmystar qolǵa alyndy», - dedí Ūlyqbek Esdáulet.
Aqynnyń aıtuynsha, pandemıya bastalǵaly berí barlyq būqaralyq sharalarǵa tyıym salynǵandyqtan, Abaı atamyzdyń tuǵan kúnín ádettegídeı jūrtty jınap, óleń oqytyp, dúrkíretíp ótkízuge múmkíndík bolmady. Degenmen, Almaty qalalyq mádenıet basqarmasynyń qoldauymen búgínde 50-den astam onlaın mádenı sharalar ūıymdastyrylyp, 2 baıqau ótkízílude.
Ardagerler keńesíníń tóraǵasy Ahan Bıjanov osyndaı qıyn-qystau kezeńde de ūly tūlǵalarymyzdy ūmyt qaldyrmaı, eń bolmaǵanda ruhyna taǵzym etu ıgí ís ekenín alǵa tartty.
«Abaı shyǵarmashylyǵyn bala kezden oqyp, álí kúnge deıín zerdelep kelemíz. Ol – jyldar toǵysynda mańyzdylyǵyn joǵaltpaıtyn asyl mūra qaldyrǵan ūly tūlǵa. Qandaı zaman bolmasyn, halyq kóshbasshylaryn ūmytpaı, olardyń síńírgen eńbekterín elep, eske alu – ūlt míndetí. Búgín de sol úshín jınalyp otyrǵan jaıymyz bar», - dedí Ahan Bıjanov.
Sharada qalyń qalamgerler qauymy bas qospasa da, jınalǵan jandar barsha qazaq jūrtyn osynau merekemen qūttyqtap, jyly lebízderín bíldírdí. Qazaqstan Jazushylar Odaǵy tóraǵasynyń orynbasary, belgílí aqyn Baqyt Bedelhannyń aıtuynsha, Abaı kúní Qazaq halqy úshín mańyzdy árí ruhanı mereke.
«Búgín – Abaı kúní. «Abaı kúní» dep alty alashqa jar salyp toılaudyń búkíl el úshín ruhanı baqyt ekenín sezínemíz. Bıyl aıtuly merekení ekínshí ret toılap otyrmyz. Abaı kúní barsha qazaqtarǵa qūtty, berekelí, jaqsy kúnderdíń bírí bolsyn dep tíleımín. Míne, búgín de Abaı atamyzdyń eskertkíshíne kelíp, eske alyp, gúl shoǵyn qoyu arqyly ruhyna taǵzym jasadyq», - dedí Baqyt Bedelhanūly.