Almaty ákímí Darhan Satybaldy men «Otbasy bank» AQ basqarma tóraıymy Lázzat Ibragımova tūrǵyn úı jaǵdaıyn jaqsartuǵa mūqtaj otbasylarǵa jańa páterlerdíń kíltín tabystau rásímíne qatysty. Baǵdarlamanyń alǵashqy kezeńí ayasynda kommunaldyq tūrǵyn úı qorynan 885 otbasy baspanamen qamtamasyz etíledí, – dep habarlaıdy aqshamnews.kz tílshísí.
Jańa qonys ıelerín qūttyqtaǵan Darhan Satybaldy azamattardy qoljetímdí tūrǵyn úımen qamtamasyz etu memlekettík áleumettík sayasattyń basym baǵyttarynyń bírí ekenín atap óttí.
«Memleket basshysy Qasym-Jomart Kemelūly Toqaevtyń tapsyrmasyna sáıkes, halyqtyń ál-auqatyn arttyru – memlekettík sayasattyń negízgí basymdyqtarynyń bírí. Ásírese, memlekettíń qoldauyna shyn mánínde mūqtaj azamattardy tūrǵyn úımen qamtamasyz etuge erekshe kóńíl bólínedí. Bıyl Almatyda tūrǵyn úıge mūqtaj 11 myńnan astam azamattyń baspana jaǵdaıyn jaqsartu josparlanyp otyr», – dedí shahar basshysy.
Onyń aıtuynsha, búgíngí kezeń almatylyqtardy tūrǵyn úımen qamtamasyz etu jóníndegí auqymdy jūmystyń bastamasy boldy. Alǵashqy kezeńde 885 páter berílse, ekínshí kezeńde – 1832, úshínshí kezeńde – 670, al tórtínshí kezeńde 6161 páterdí tabystau josparlanǵan. Osylaısha, jyl sońyna deıín myńdaǵan almatylyq otbasy baspana máselesín sheshuge múmkíndík alady.
Jalpy, 2026 jyly 8250 azamat jaldamaly tūrǵyn úımen qamtamasyz etíledí. Sonymen qatar, 1298 adam jeńíldetílgen nesıe baǵdarlamalary arqyly baspana satyp alsa, kemínde 1650 jas maman «Almaty jastary» baǵdarlamasy ayasynda jeke baspanasynyń ıesí atanady.
Būdan bólek, qalada memlekettík qoldaudyń qosymsha tetíkterí de jalǵasady. Áleumettík osal sanattaǵy azamattarǵa ıpotekalyq nesıe rásímdeu kezínde bastapqy jarnanyń bír bólígín óteuge arnalǵan tūrǵyn úı sertıfıkattary beríledí. Bıyl osyndaı 200 sertıfıkat tabystau josparlanǵan.
Sondaı-aq, jaldamaly tūrǵyn úıde tūratyn azamattarǵa jaldau aqysynyń bír bólígín subsıdıyalau tetígí de saqtalady. Būl shara tūrǵyn úıge mūqtaj otbasylardyń qarjylyq júktemesín azaıtyp, baspananyń qoljetímdílígín arttyruǵa múmkíndík beredí.