Almaty volonterlerí «Ardagerge qūrmet» qaıyrymdylyq aktsıyasy ayasynda ŪOS ardagerleríne qamqorlyq kórsetude
Ūly Jeńístíń 80 jyldyǵyna oraı Almaty qalasynda «Ardagerge qūrmet» atty auqymdy qaıyrymdylyq aktsıyasy óttí. Aktsıya ayasynda Almaty qalasynyń eríktílerí soǵys ardagerleríne tūrmystyq jáne áleumettík qoldau kórsetíp, ardagerlerge degen sheksíz qūrmet pen rızashylyǵyn bíldírdí, dep habarlaıdy aqshamnews.kz
Eríktíler ardagerlerdíń úıleríne baryp, azyq-túlík pen qajettí zattardy jetkízdí, sondaı-aq tūrmystyq sharualarǵa kómek kórsettí. Būl aktsıya tek aǵa buynǵa degen qamqorlyqtyń kórínísí ǵana emes, sonymen qatar jastar men ardagerler arasyndaǵy ūrpaqtar sabaqtastyǵyn nyǵaıtu jolyndaǵy mańyzdy qadam boldy. Aktsıya ayasynda Almaty qalasynda tūratyn barlyq 21 ŪOS ardagerín qamtu josparlanyp otyr.
«Bíz ardagerlerge jaı ǵana kómek kórsetíp jatqan joqpyz. Būl – erlíkke taǵzym, tarıhqa qūrmet. Olardyń árbír estelígí – bíz úshín tírí shejíre. Osyndaı kezdesuler arqyly bíz shynaıy patrıotızm men jauapkershílík sezímín úırenemíz», – dep eríktí Shámshí Qūdaıbergen atap óttí.
Eríktíler atap ótkendeı, būl bír rettík shara emes. Ol – almatylyq jastardyń júıelí túrde júzege asyryp kele jatqan tūraqty bastamasynyń qūramdas bólígí. Almaty qalasynyń eríktílerí mūndaı qaıyrymdylyq ís-sharalaryn únemí ūıymdastyryp otyrady. Máselen, qys mezgílínde olar ardagerler men zeınetkerlerdíń aulalaryn qardan tazartuǵa kómektesíp, kommunaldyq qyzmet ókílderíne ystyq shaı taratu boıynsha aktsıyalar ótkízedí. Būl bastamalar – jastardyń belsendí azamattyq ūstanymynyń, qoǵamdaǵy bírlíktíń jáne adamdarǵa degen shynaıy janashyrlyqtyń aıqyn kórínísí.