Almatynyń Bas josparyn túzetu – megapolıstí jańǵyrtudyń mańyzdy kezeńderíníń bírí. Qalanyń ósu qarqyny qala qūrylysy sheshímderín uaqytyly jańartudy talap etedí. Alaıda túzetulerdíń basty sebebí Memleket basshysynyń tauly aımaqtarda qūrylys saluǵa tyıym salu jóníndegí tapsyrmasy boldy.
Elímízdíń qūrmettí sáuletshísí Janat Aıtíleudíń aıtuynsha, Bas jospar būl qalanyń qazírgí ahualyn kórsetíp qana qoımaı, sonymen bírge qalalyq ortany ūzaqmerzímdí retteudíń de qūraly.
«Tau bókterínde qūrylys júrgízuge shekteu qoyu megapolıstíń ósu modelín ózgertíp, qala qūrylysy parametrlerín qaıta qaraudy talap etedí. Būl aımaq – ómír sapasyn aıqyndaıtyn tabıǵı resurs. Prezıdent tapsyrmasy jańa qala qūrylysy sayasatynyń írgetasyna aınalyp otyr. Bas jospardy qaıta qarau qalanyń damuyn neǵūrlym tūraqty arnaǵa būryp, tabıǵı júıení saqtau jáne halyq sanynyń būrynǵy boljamdardan asyp túsuín eskeru úshín qajet. Būl túzetu bílím, medıtsına, tūrǵyn úı salalaryndaǵy qajettílíktí naqtylaudy, sondaı-aq kólík ınfraqūrylymynyń qabíletín qaıta esepteudí qamtıdy», – dedí sarapshy.
Ol Almatydaǵy kólík júktemesí álí de basty máselelerdíń bírí ekenín jetkízdí. Sondyqtan jańartylǵan Bas jospar qoǵamdyq kólíktí damytuǵa, sonyń íshínde tyǵyz qūrylysy bar nemese relefke baılanysty joldy keńeıtu múmkín emes jerlerde aspaly jol syndy ınnovatsıyalyq sheshímderge erekshe nazar audarady.
Sonymen qatar, Bas jospardy túzetu jobasynda sayabaqtardan bastap skverlerge deıín tolyqqandy jasyl aımaqtar jelísín qalyptastyru kózdelgen. Maqsat — halyqty jasyl jelekpen qamtamasyz etu boıynsha halyqaralyq standarttarǵa (bír adamǵa kemínde 16 m²) jaqyndau.
«Bas jospardy túzetu kólík pen áleumettík ınfraqūrylymdy damytuǵa, strategıyalyq memlekettík basymdyqtardy íske asyruǵa, jaıly, qauípsíz árí ekologıyalyq qala qalyptastyruǵa negíz bolady. Būl Almatyny úılesímdí, jasyl árí zamanauı qalaǵa aınaldyru múmkíndígí. Eń bastysy, bekítílgen strategıyany júıelí túrde júzege asyru», – dedí Janat Aıtíleu.