Otan qorǵaushylar kúní qarsańynda Almatyda jastar arasynda azamattyq jauapkershílíktí, dene daıyndyǵyn jáne komandalyq ruhty damytuǵa baǵyttalǵan «BES QARU» áskerı-patrıottyq oıyny óttí, – dep habarlaıdy aqshamnews.kz tílshísí.
Ís-sharaǵa qala ákímdígí, qūqyq qorǵau organdarynyń ókílderí, qoǵam qaıratkerlerí, deputattar, sondaı-aq Almaty jastary qatysty. Qūrmettí qonaq retínde Almaty qalasy ákímíníń orynbasary Abzal Núkenov qatysty.
Ís-sharanyń ashyluy Qazaqstan Respublıkasynyń Memlekettík Tuyn saltanatty túrde alyp kírumen jáne Ánūrannyń oryndaluymen bastaldy. Qūttyqtau sóz sóılegen Abzal Núkenov mūndaı bastamalardyń jas ūrpaqty tárbıeleudegí mańyzyn atap óttí.
«Būl joba jastardyń boıynda patrıottyq ruhty, tártíptí, jauapkershílíktí jáne komandalyq bírlíktí qalyptastyruǵa baǵyttalǵan. Mūndaı bastamalar Otanǵa degen qūrmettí arttyryp, jastardy el bolashaǵyna beıjaı qaramauǵa shaqyrady», — dedí Abzal Núkenov.
Ol sondaı-aq Memleket basshysy Qasym-Jomart Toqaevtyń naqty íspen kórínetín patrıotızmníń mańyzdylyǵy turaly sózín eske saldy:
«Bíz tuǵan jerge qamqorlyq jasaudan, qoǵamǵa qyzmet etuge daıyn boludan kórínetín patrıotızmdí qoldauymyz kerek».
Qūttyqtau sózdí QR ÍÍM Maqan Esbolatov atyndaǵy akademıyasynyń bastyǵy, polıtsıya polkovnıgí Qalıjan Qoblandın de sóılep, jastardy qyzmetke daıyndau men kóshbasshylyq qasıetterdí damytu mańyzdylyǵyn atap óttí.
Baǵdarlamanyń negízgí bólígí kópsatyly estafeta boldy. Ol sporttyq jáne zıyatkerlík tapsyrmalardy qamtydy: júgíru, kúsh jattyǵulary, áskerı daıyndyq elementterí, Kalashnıkov avtomatyn bólshekteu jáne jınau, analıtıkalyq oılau men jedel sheshím qabyldauǵa arnalǵan tapsyrmalar.
Qatysushylar tek fızıkalyq tózímdílíkterín ǵana emes, qūqyqtyq bílímderín, komandalyq jūmys daǵdylaryn jáne kúrdelí jaǵdaılarda jyldam áreket etu qabíletterín kórsettí.
Ís-shara kontserttík baǵdarlamamen jalǵasyp, estafeta qorytyndysy boıynsha jeńímpazdar men qatysushylar marapattaldy.
Almaty elímízdegí eń «jas» qalalardyń bírí — mūnda 14 pen 35 jas aralyǵyndaǵy 712 myńnan astam jas tūrady. Osyǵan baılanysty patrıottyq tárbıení damytu jáne jastar bastamalaryn qoldau qalalyq sayasattyń basym baǵyttarynyń bírí bolyp qala beredí.
«BES QARU» áskerı-patrıottyq oıyny azamattyq jauapkershílík, bírlík jáne Otanǵa degen súıíspenshílík qūndylyqtaryn nyǵaıtuǵa baǵyttalǵan mańyzdy alańǵa aınalyp, Almaty jastarynyń belsendí árí jauapty buynyn qalyptastyruǵa óz úlesín qosty.