Qazaqstan Respýblıkasynyń Premer-mınıstri Oljas Bektenovtyń sheshimimen 2025 jyly 2 jeltoqsanda qabyldanǵan qaýly negizinde Almaty qalasy Mádenıet basqarmasyna qarasty Memlekettik qýyrshaq teatryna «akademıalyq» mártebe berildi, dep habarlaıdy aqshamnews.kz
Bul mártebe búldirshinderdiń boıyna izgiliktiń dánegin bir ǵasyrǵa jýyq ýaqyt boıynsha egip kele jatqan óner ordasyna ult mádenıetiniń damýy jolyndaǵy zor eńbegi úshin berilip otyr.
Kishkentaı kórermenderdi ertegiler álemine jeteleıtin Memlekettik qýyrshaq teatrynyń negizi 1935 jyly belgili qoǵam qaıratkeri Temirbek Júrgenovtyń bastamasymen qalanǵan. 90 jyldyq tarıhy bar óner ordasy búgingi kúnde kórermenniń suranysyna saı tanymdyq ári tárbıelik máni zor ár alýan baǵyttaǵy qyzyqty da kóńildi, kórkemdik deńgeıi joǵary spektáklder legin usynyp keledi.
Qazaq halqynyń ertegileri men ańyzdaryna negizdelgen «Orteke», «Naýryz qupıasy», «Ur, toqpaq!», «Er Tóstik», «Qańbaq shal», «Altyn adam» syndy balalarǵa arnalǵan spektáklder ulttyq qundylyqtarymyzdy dáriptep qana qoımaı, balalardy patrıottyq, batyldyq, jasampazdyq sekildi izgi qasıetterge jeteleıdi. Álem ádebıetiniń úzdik úlgileri qatarynan tabylatyn ertegiler men shyǵarmalar negizinde sahnalanǵan «Qasqyr men jeti laq», «Qyzyl telpek», «Úsh toraı», «Qar hanshaıymy», «Túıme qyz» syndy qoıylymdar búldirshinderge meıirimdiliktiń, qamqorlyqtyń, adamgershiliktiń mańyzyn úıretedi. Al eresekterge arnalǵan «Men kimmin..», «Shekpen», «Shal men teńiz», «Ana – Jer ana», «Makbet. Illúzıa», «Romeo men Djýletta» syndy spektáklder kórermenge jan-dúnıesine úńilip, rýhanı serpilis alýǵa múmkindik beredi.
Memlekettik qýyrshaq teatry úshin sońǵy jyldardaǵy eń iri mádenı bastamalardyń biri – jyl saıyn turaqty túrde uıymdastyrylyp kele jatqan Halyqaralyq «Almaty Puppet Festival» qýyrshaq teatrlar festıvali. Atalǵan joba Almatyny halyqaralyq qýyrshaq óneriniń mańyzdy ortalyqtarynyń birine aınaldyrdy. Festıvál aıasynda Ispanıa, Italıa, Chehıa, Polsha, Qytaı, Úndistan, Bolgarıa, Túrkıa, Reseı, Ázirbaıjan, Ózbekstan, Qyrǵyzstan jáne Qazaqstannyń tańdaýly ujymdary bas qosyp, shyǵarmashylyq tájirıbe almasyp, qýyrshaq óneriniń jańa baǵyt-baǵdaryn birge talqylaıtyn kásibı alań qalyptasty. Búldirshinder men eresek kórermen úshin bul mereke naǵyz rýhanı jańǵyrý keńistigine aınaldy.
Sonymen qatar, Memlekettik qýyrshaq teatrynyń halyqaralyq sahnadaǵy belsendiligi de jyl sanap artyp keledi. Ujym Fransıa, Kanada, Bolgarıa, Túrkıa syndy birqatar elde ótken aıtýly halyqaralyq teatr festıvaline qatysyp, júldeli orynnan kórine bildi. Bul jetistikter qazaq qýyrshaq óneriniń shetelderdegi tanymaldyǵyn arttyryp qana qoımaı, otandyq teatrdyń kásibı deńgeıin jańa bıikke kóterýge yqpal etti.
Aldaǵy ýaqytta da Memlekettik qýyrshaq teatry kórkemdik izdenisti toqtatpaı, tyń rejıserlik sheshimdermen erekshelenetin jańa spektáklderdi sahnalaýdy, halyqaralyq jobalar aıasyn keńeıtýdi jáne kórermenmen baılanysty odan ári nyǵaıtýdy maqsat etip otyr.
90 jylǵa jýyq úzdiksiz shyǵarmashylyq izdenis, ulttyń rýhanıatyna adal qyzmet, halyqaralyq deńgeıdegi belsendilik jáne kórermen senimi – Memlekettik qýyrshaq teatrynyń qazirgi tańdaǵy bıik tuǵyrynyń aıqyn kórinisi. «Akademıalyq» mártebe – osy joldan taımaı, ónerge degen jaýapkershilik pen talǵam bıigin saqtap kele jatqan ujym eńbeginiń zańdy jalǵasy.