Almaty qalasy ákímíníń orynbasary Abzal Núkenov ál-Farabı atyndaǵy Qazaq ūlttyq unıversıtetínde baryp, JOO-nyń qazírgí ǵylymı ázírlemelerímen, ınfraqūrylymymen jáne ınnovatsıyalyq múmkíndíkterímen tanysty.
Qala ákímíníń orynbasary joǵary tehnologıyalyq jobalar men ınnovatsıyalyq ázírlemeler ūsynatyn Farabi Hub ınnovatsıyalyq ortalyǵynda boldy. Búgínde hab írí ınvestıtsıyalyq kompanıyalarmen, ǵylymı-zertteu ınstıtuttarymen jáne jetekshí sheteldík unıversıtettermen tyǵyz áríptestík ornatqan. Zamanauı qūrylǵylarmen jabdyqtalǵan zerthanalarda túrlí baǵyt boıynsha ǵylymı zertteuler júrgízílíp, jańa tehnologıyalar ázírleníp jatyr. Ortalyqtyń negízgí maqsaty – QazŪU ǵalymdarynyń ǵylymı ıdeyalary men jobalaryn ekonomıkaǵa engízudí jedeldetu jáne ınnovatsıyalardy kommertsıyalandyru úderísín kúsheıtu.
Būdan keıín Abzal Núkenov Óndírístík robototehnıka jáne ınjenerlík qūzyretter ortalyǵynda boldy. Mūnda nemístíń joǵary sapaly KUKA robottary ornatylǵan. QazŪU robototehnıkany júıelí damytyp, būl salada elímízdegí jetekshí ǵylymı ortalyqtardyń bíríne aınalyp keledí. Unıversıtet mamandary zıyatkerlík júıeler, ūshqyshsyz ūshu apparattary jáne avtomattandyrylǵan óndírístík sheshímder baǵytynda zertteu júrgízíp otyr.
Ákímníń orynbasary halyqaralyq deńgeıde jūmys ísteıtín «Tsıfrlyq tehnologıyalar jáne robototehnıka» ınstıtutynyń jáne Robototehnıka ortalyǵynyń qyzmetímen de tanysty. 600 sharshy metr aumaqta zamanauı óndírístík tehnologıyalar men jasandy ıntellekt negízínde qūrylǵan bes ınnovatsıyalyq platforma jūmys ísteıdí. Mūnda studentter tsıfrlyq óndírís úderísterín, kúrdelí avtomattandyrylǵan júıelerdí meńgeríp, ozyq tehnologıyalar salasynda tájírıbelík daǵdylardy meńgeredí.
JOO-nyn aralaǵan Núkenov unıversıtet bazasynda ornatylǵan superkompyuterdíń jūmysymen tanysty. Ortalyq Azıyadaǵy eń quatty esepteu júıeleríníń bírí sanalatyn būl superkompyuter elímízdíń ǵylymı ınfraqūrylymyn kúsheıtíp, ÍT jáne jasandy ıntellekt salasyndaǵy mamandardy dayarlauǵa jańa múmkíndíkter ashady. Onyń esepteu quaty 2000 teraflops, al arhıtekturasy 400-den astam Intel Xeon 6330N serverlík protsessorlarynan tūrady.
Sonymen qatar, Abzal Núkenov geografıya jáne tabıǵatty paıdalanu fakultetíne baryp, QazŪU ǵalymdarynyń tabıǵatty qorǵau, topyraq qūnarlylyǵyn arttyru, qūrǵaqshylyqtyń aldyn alu jáne su sapasyn jaqsartuǵa baǵyttalǵan ǵylymı jobalarymen tanysty.
Qala ákímíníń orynbasary unıversıtettíń tehnıkalyq bazasynyń joǵary deńgeıín atap, Almaty jastaryna sapaly bílím berude zamanauı ǵylymı orta qalyptastyrudyń mańyzdylyǵyna toqtaldy. Ol unıversıtet ūjymyna ǵylymı jáne ınnovatsıyalyq jobalardy júzege asyruda tabys tílep, qala ákímdígí bílím, ǵylym jáne bílíktí maman dayarlau baǵytyndaǵy yntymaqtastyqty árí qaraı nyǵaıtuǵa múddelí ekenín jetkízdí.