Almatyda jańajyldyq merekelik kúnder tynysh ótip, oqys oqıǵa bolǵan joq. Polısıanyń kúsheıtilgen jumys rejımi men jedel áreket etý qyzmetterimen birlesip qımyldaýynyń arqasynda turǵyndar men qala qonaqtarynyń qoǵamdyq tártibi men qaýipsizdigi qamtamasyz etildi. Óńirlik komýnıkasıalar qyzmetinde Almaty qalalyq PD Qoǵamdyq qaýipsizdik basqarmasy bastyǵynyń orynbasary Aıtan Eleýsizov osylaı dep málimdedi, - dep habarlaıdy aqshamnews.kz tilshisi.
Onyń aıtýynsha, 15 jeltoqsannan bastap jeke quram kúsheıtilgen. Adam kóp jınalatyn oryndarǵa – alańdarǵa, saıabaqtarǵa, jańajyldyq jáne mádenı-buqaralyq is-shara ótetin jerlerge tártip saqshylary kóp nazar aýdarypty.
Qalanyń negizgi alańdarynda ornatylǵan barlyq qalalyq jańajyldyq shyrshalar men olarǵa irgeles aýmaqtar polısıanyń turaqty baqylaýynda boldy. Mereke kúnderi jaıaý jáne avtosaqshylar jaǵy kúsheıtilip, saqshylardyń qosymsha kúshteri, ýchaskelik ınspektorlar men mamandandyrylǵan bólimshelerdiń ekıpajdary tynbaı jumys istedi.
1–4 qańtar aralyǵynda Almatyda 45 qylmys tirkeldi. Olardyń 32-si patrúldik polısıa men ýchaskelik ınspektorlardyń kúshimen «izi sýymaı» jatyp ashyldy. Sonymen qatar, qoǵamda dúrbeleń týdyrýy múmkin asa aýyr qylmystar men quqyq buzýshylyqtarǵa jol berilgen joq.
Buzaqylyq, sondaı-aq turmystyq jáne otbasylyq-turmystyq janjal sıaqty negizinen mereke kúnderi jıilep ketetin quqyq buzýshylyq kóp tirkelgen eken. Barlyq habarlamaǵa polısıa der kezinde nazar aýdarǵan.
«Osy kúnderi qylmystyń aldyn alýǵa kóp kóńil bólindi. Polısıanyń kósheni, turǵylyqty jerler men qoǵamdyq keńistikterdi barlap júrgeni qaýipsizdik pen tártipti saqtaýǵa yqpal etti», – deıdi Aıtan Janamanuly.
Almaty qalalyq Polısıa departamentinde qoǵamdyq tártip pen qala turǵyndarynyń qaýipsizdigin qamtamasyz etý jumystary budan ári de «Zań jáne tártip» qaǵıdaty aıasynda jalǵasa beretinin atap ótti.