Almaty oblysynda 42 shaqyrymdyq "Ūzynaǵash - Otar" joly paıdalanuǵa beríldí.
Atalǵan joldyń íske qosyluymen magıstraldí jańartu tolyǵymen ayaqtaldy. Endí Almatydan Shymkentke deıíngí jol tolyq tórt jolaqty bolyp, júríp-tūru áldeqaıda yńǵaıly bolmaq, - dep habarlaıdy Aqshamnews.kz Astanatv.kz-ke sílteme jasap.
Ashylu saltanatyna QR Kólík vıtse-mınıstrí Maqsat Qalıaqparov, Almaty oblysy ákímíníń orynbasary Rustam Isataev jáne óńír aqsaqaldary qatysty. Rásímde qozǵalysty bastau batyrmasy basylyp, jańa jol arqyly alǵashqy bolyp 15 kólíkten tūratyn avtokolonna júríp óttí.
Bıyl bíz el boıynsha 13 myń shaqyrym jolda jóndeu jáne qaıta jańartu jūmystaryn júrgízu arqyly rekordtyq nátıjege qol jetkízdík. Būl – Memleket basshysynyń qoldauy men jol salasynyń qyzmetkerleríníń kúndelíktí atqaryp júrgen eren eńbegíníń arqasy. Olar azamattar úshín qauípsíz, árí yńǵaıly joldar salyp, óńírlerdíń damuyna jańa múmkíndíkter ashuda», – dedí ís-shara barysynda Kólík vıtse-mınıstrí Maqsat Qalıaqparov.
Sonymen qatar joldy ashu saltanatynyń ayasynda jobany íske asyruǵa erekshe úles qosqan jūmysshylar marapattaldy. Olarǵa vedomstvolyq medaldar, Alǵys hattar jáne Kólík mınıstrlígíníń Qūrmet gramotalary tabystaldy.
Aıta keteıík, búgín ashylǵan «Ūzynaǵash – Otar» kúre jolynda negízgí qūrylys-montaj jūmystary ótken jyly bastalyp, nebárí ekí jylda tolyq ayaqtaldy. Jobaǵa 163 bírlík tehnıka, 290 maman jūmyldyrylyp, ekí asfalt-beton zauyty men tórt jol-qūrylys basqarmasy jūmys ístedí.
42 shaqyrymdyq «Ūzynaǵash – Otar» tasjolynyń ashyluymen Almaty men Shymkent arasyndaǵy jol tolyq tórt jolaqty bolyp, júríp-tūru áldeqaıda yńǵaıly, árí qauípsíz bolmaq. Būl magıstraldíń ótkízu qabíletín arttyryp, jol júru uaqytyn qysqartady, qozǵalys qauípsízdígín jaqsartady jáne óńírler arasyndaǵy kólík baılanystaryn nyǵaıtyp, Ortalyq Azıya memleketterímen ekonomıkalyq qatynastardy odan árí kúsheıterí sózsíz.
