Bıyl Almaty Marathon on tórtínshí ret ótíp jatyr. Tartysty dodaǵa 60-tan asa elden kelgen 16 myń adam qatysyp, baq synap jatyr.
Qatysushylardyń qauípsízdígín polıtsıya, dárígerler men ūıymdastyrushylar qamtamasyz ettí. Atap aıtqanda, 13 medıtsınalyq punkt ornatylyp, 12 jedel járdem kólígí, 10 velodáríger jáne shamamen 90 medıtsınalyq eríktí kezekshílík atqardy.
Kásíbı sportshylardan bastap, salauatty ómír saltyn ūstanatyn áuesqoılar ózderín synap kóru maqsatynda jáne Qazaqstandaǵy júgíru qozǵalysyn damytuǵa úles qosu úshín 10-nan 42,2 kılometrge deıíngí qashyqqa shyqty.
Tań atysymen qalanyń ortalyq kóshelerínde ádettegíden ózgeshe kórínís. Energıyaǵa toly muzyka, kóńíldí eríktíler men qatysushylardyń kúlímsíregen júzderí merekelík atmosferany odan árí jandandyrdy. Marafon tek sporttyq jarys qana emes, ol – bírlík, ruh jáne salauatty bolashaqqa ūmtyludyń sımvoly.
Almatyda ótken marafonǵa shetelden kelgen qatysushylar da bar.
«Men Fılıppınnen keldím jáne búgíngí Almatydaǵy marafonǵa qatysu men úshín úlken quanysh boldy. Būl keremet tájírıbe! Barlyq qatysushynyń jígerí men yntasy mení qatty tańǵaldyrdy. Marafon arqyly adamdardyń sportqa degen súıíspenshílígín jáne bír-bíríne qoldau kórsetetínín kóríp, shabyt aldym. Osyndaı ís-sharalarǵa qatysu arqyly densaulyqqa kóńíl bólu jáne jańa dostar tabu múmkíndígín joǵary baǵalaımyn. Almaty marafony – shynymen erekshe, este qalarlyq oqıǵa, – dedí fılıppındík aru Djona Florrıdo.
«Alatau Aqparat» medıaholdıngíníń «Vechernıı Almaty» gazetíníń jurnalısí Aıgúl Kolumbetova ekínshí ret 10 shaqyrym júgíríp shyqty. Ol holdıngtíń sport jetístíkterí qorjynyna taǵy da medal qosyp, marafonǵa qatysu onyń dástúrí men shabyt kózíne aınalǵanyn atap óttí.
«Men úshín marafonǵa qatysu jaı ǵana sport emes. Byltyr alǵash ret baǵymdy synap kórdím, al bıyl qatarynan ekínshí ret márege shyǵyp, taǵy da medal alyp otyrmyn. Būl mení alǵa ūmtyluǵa shabyttandyrady jáne jíger beredí».
Astana qalasynan kelgen Aıdana Utenıyazova marafonǵa ekínshí ret qatysypty.
«Ekínshí ret qatysqan baıqauǵa búkíl dostarymdy shaqyrdym. Daıyndyǵym az bolsa da, boıymdaǵy energıya men tolqudy sózben aıtyp jetkízu múmkín emes», – dedí.
Skandınavıyalyq jayau júgíru qatysushylarynyń bírí Dına Karıbaeva salauatty ómír saltyn ūstanu kerek ekenín jetkízdí.
«Skandınavıyalyq jayau júgíruge ekínshí ret qatysyp otyrmyn. Bírínshí ret ótken jyly boldy. Salauatty ómír saltyn ūstanamyn, ózím dárígermín. Almaty Marathon-ǵa dosymmen bírge keldím», – dedí.
Ramına SAIDALIMOVA, baıqauǵa qatysushy:
«Basty maqsatym – jeńís emes, bír tempte júgíríp, densaulyǵymdy jaqsartuǵa kúsh salu. Bíraq medaldí jeńíp alsam, būl men úshín zor jetístík bolar edí», – dedí.
Trassa boıyndaǵy kórermenníń qoldauy keremet boldy. Jankúıerler júgírushílerdí jígerlendíríp, barlyǵyna shabyt beretín atmosfera syılady.
Almaty Marathon – 2025 taǵy da Ortalyq Azıyadaǵy eń írí júgíru alańy ekenín dáleldedí. Ūıymdastyrylu jūmystary joǵary deńgeıde ótíp, barlyq qatysushy qauípsízdík pen jaılylyqty sezíndí.
