Almaty qalasynyń Nurkent shaǵynaýdanynda ornalasqan Ústel tenısi ortalyǵynda megapolıs jýrnalıseri men blogerleri arasynda tartysty da belsendi týrnır ótti, - dep habarlaıdy Aqshamnews.kz.
Sporttyq sharany Almaty qalasy ákimdigi İshki saıasat basqarmasynyń janyndaǵy Óńirlik komýnıkasıalar qyzmeti uıymdastyrdy.
Qalanyń jetekshi medıa ókilderi men tanymal ınflúenserlerinen quralǵan 35-ten astam qatysýshyny bir alańǵa jınaý ońaı sharýa bolǵan joq, degenmen is-shara bastalǵan sátten-aq atmosfera qyzyqqa toly boldy.
Almaty qalasy ÓKQ jetekshisi Balslý Alekenova týrnır qatysýshylaryna quttyqtaý sózin joldady. Ol Óńirlik komýnıkasıalar qyzmeti jyl saıyn medıa qaýymdastyq úshin sporttyq is-sharalar ótkizip kele jatqanyn atap ótti: mını-fýtbol, voleıbol, boýlıń jáne ústel tenısinen týrnırler jyl saıynǵy dástúrge aınaldy.
«Mundaı kezdesýler dostyq qarym-qatynasty nyǵaıtyp, jaqsy kóńil-kúı syılaıdy jáne bir-birimizben emen-jarqyn aralasýǵa múmkindik beredi»,- dedi Balslý Alekenova týrnırdiń ashylýynda.
Saıys barlyq talapqa saı uıymdastyryldy: tóreshilikti Ústel tenısi ortalyǵynyń jeti kásibı jattyqtyrýshysy júrgizdi.
Jýrnalıserdiń bul sport túrine qyzyǵýshylyǵy joǵary - kóptegen redaksıalar keshki ýaqytta korporatıvtik jattyǵýlar ótkizedi. Sondyqtan júldeler úshin tartys óte qyzý ótti.
Uıymdastyrýshylar alty júldeli oryndy qarastyrdy: jeńimpazdarǵa eki birinshi, eki ekinshi jáne úsh úshinshi oryn berildi.
Týrnır jeńimpazdary:
1-oryn: Erkebulan Smaılov (SMA), Aınur Baıtýmanova (NMG)
2-oryn: Estaı Bojan («Alataý aqparat»), Saıat Shapaǵatov («Habar» telearnasy)
3-oryn: Symbat Baıjokenov (31 arna), Asqarbek Qazanǵap (31 arna)
Barlyq júldegerlerge qarjylaı syılyqtar men kýboktar tabystaldy, sondaı-aq árbir qatysýshyǵa alǵys hattar usynyldy. Sporttyq kún fýrshetpen qorytyndylanyp, qatysýshylar beıresmı atmosferada áńgimelesip, oıynnan alǵan áserlerimen bólisti.
Týrnır taǵy bir ret almatylyq medıa qaýymdastyǵynyń tek jumys istep qana qoımaı, sporttyq alańda da belsendi demala alatynyn kórsetti.