Almaty qalasynda Halyqaralyq eriktiler kúnine oraı uıymdastyrylǵan qalalyq eriktiler forýmy ótti, dep habarlaıdy aqshamnews.kz
İs-shara Almaty qalasy Jastar saıasaty basqarmasynyń qoldaýymen júzege asty. Jıynǵa eriktilik uıymdardyń jetekshileri, jastar birlestikteri, áleýmettik jáne ekologıalyq bastamalardyń ókilderi qatysty. 2025 jyly almatylyq eriktiler qalada eriktilikti damytý boıynsha aýqymdy ári júıeli jumys atqardy: 50 myńnan astam erikti tirkelip, olardyń 10 myńnan astamy áleýmettik, ekologıalyq jáne bilim berý bastamalaryna alǵash ret tartylǵan jańa qatysýshylar boldy.
Eriktilik qozǵalystyń qyzmeti 42 iri uıymdy biriktiretin jáne jan-jaqty ádistemelik ári uıymdastyrýshylyq qoldaý kórsetetin Eriktiler front-keńsesi arqyly retteledi. Áleýmettik aksıalar aıasynda 80-nen astam otbasyna ataýly kómek kórsetilip, halyqtyń osal toptaryna qoldaý bildirildi, «Eco Qala Fest» pen «JasEkoPatrýldi» qosqanda ekologıalyq jobalar men senbilikter ótkizildi. Ashyq aspan astyndaǵy kınokórsetilimder, dárister men kezdesýler uıymdastyrylyp, jasóspirimder men jastarǵa arnalǵan 60-tan astam bilim berý kýrsy ótkizildi.
Sonymen qatar, 800-den astam erikti TJD-men áriptestik aıasynda tótenshe jaǵdaılarǵa daıyndyq boıynsha arnaıy oqytýdan ótti, al «Jaqsylyq ister marafony» sheńberindegi qaıyrymdylyq is-sharalarǵa 12 myńnan astam adam tartyldy. Forým barysynda eń belsendi eriktiler men eriktilik uıymdar arnaıy alǵys hattarmen jáne syılyqtarmen marapattaldy. Bul olardyń eńbegine degen qurmetpen qatar, jańa qatysýshylarǵa da shabyt berdi.