Qalanyń ortalyq alańdary men saıabaqtardan bastap shetki shaǵynaýdandarǵa deıingi barlyq aýmaǵy bezendirilip, jylylyqqa, jaılylyq pen qysqy sıqyrǵa toly birtutas merekelik orta qalyptasty.
Abaı jáne Astana alańdary, Arbat, Panfılov kóshesi, 28 gvardıashy-panfılovshylar atyndaǵy saıabaq, «Almaty Arena» men «Atakent» syndy dástúrli jańa jyldyq oryndar retinde merekelik is-sharalardyń negizgi ortalyǵyna aınaldy. Munda jármeńkeler, konsertter uıymdastyrylyp, turǵyndar úshin otbasylyq serýenderge qolaıly jaǵdaı jasaldy. Bıyl merekelik bezendirý aýqymy keńeıip, árbir turǵynǵa qýanysh syılaý maqsatynda jańa bezendirilgen qoǵamdyq keńistikter paıda boldy.
Bul ıgi iske qalalyq kásipkerlik nysandary da qomaqty úles qosty. Saýda ortalyqtary, dámhanalar, meıramhanalar, qonaq úıler men keńse ǵımarattary qasbeti men vıtrınasyn sándep, qalanyń jańa jyldyq kórkin odan ári aıshyqtaı tústi.
Qalalyq keńistiktiń kórkemdik mazmunyna erekshe mán berildi. Almatynyń ár túkpirinde ertegi keıipkerleriniń jaryq músinderi, 2026 jyldyń nyshandarymen kómkerilgen art-nysandar, qar ushqyny, syılyq, buǵy jáne jańa jyldyq shar beınesindegi sándik kompozısıalar boı kóterdi. Bul kórkem ınstallásıalar qala turǵyndary men qonaqtary úshin súıikti fotosýret túsirý alańyna aınaldy.
Bıylǵy merekelik bezendirýde «Taza Qazaqstan» taqyrybyndaǵy shaǵyn sáýlet nysandary aıryqsha oryn aldy. Olar jańa jyldyq sán men ekologıalyq ıdeıany ushtastyryp, tabıǵatqa janashyrlyq tanytý men ekologıalyq jaýapkershilik mádenıetin dáripteıdi.
