Óńírlík kommunıkatsıyalar qyzmetínde Almaty qalasy Sport basqarmasynyń basshysy Darhan Nūrhanūly joǵary jetístíkter sportyn damytu men sportta rezerv dayarlaudyń qalaı qolǵa alynyp jatqanyn bayandady.
Onyń aıtuynsha, qazír Almatyda sporttyń 87 túrí boıynsha rezerv dayarlanyp jatyr. Būl qalany elímízdegí kásíbı sportty damytyp jatqan negízgí ortalyqtyń bírí etíp otyr.
«2025 jyly almatylyq sportshylarǵa 6 187 sporttyq ataq beríldí. Būl 2024 jylmen salystyrǵanda 14%-ǵa artyq (5 426 ataq). Olardyń qatarynda Qazaqstan Respublıkasynyń 8 eńbek síńírgen sport sheberí men 117 halyqaralyq dárejedegí sport sheberí bar. Būl sportshylardy dayarlau deńgeıíníń joǵary ekendígíne dálel», – dedí Sport basqarmasynyń basshysy.
Spıkerdíń sózínshe, 2025 jyly Qazaqstan Respublıkasynyń Ūlttyq qūramalaryna 2 376 sportshy dayarlanǵan. Onyń íshínde 853 sportshy negízgí qūramǵa, 713 – jastar qūramasyna, 296 – jasóspírímder qūramasyna endí. Būl kórsetkísh ótken jylmen salystyrǵanda 7,8%-ǵa joǵary bolyp shyqqan.
Sonymen qatar, elímízdíń ūlttyq qūramanyń jalpy sanynyń úshten bíríne juyǵyn Almaty qalasynyń sportshylary qūraıdy. Būl qalanyń Qazaqstannyń sporttyq áleuetín qalyptastyrudaǵy jetekshí rólín kórsetedí.
Almatylyq sportshylar túrlí deńgeıdegí resmı jarystarda tūraqty túrde joǵary nátıje kórsetíp keledí. 2025 jyly olar 5 562 medal jeńíp aldy, būl 2024 jylmen salystyrǵanda 9%-ǵa kóp (5 102 medal).
Olardyń íshínde:
– Qazaqstan Respublıkasynyń chempıonattarynda – 4 800 medal;
– Azıya chempıonattarynda – 362 medal;
– Álem kubogynyń kezeńderínde – 212 medal;
– Álem chempıonattarynda – 188 medal.
Darhan Nūrhanūly Almatyǵa ǵana emes, búkíl el úshín mańyzdy bolǵan bíraz jetístíkke de toqtalyp óttí.
Nazym Qyzaıbaı Qazaqstan tarıhynda alǵash ret bokstan úsh dúrkín álem chempıony atanyp, jas ūrpaqqa úlken úlgí boldy.
Mánerlep syrǵanaushy Mıhaıl Shaıdorov Bostonda ótken álem chempıonatynda kúmís medal ıeleníp, qazaqstandyq mánerlep syrǵanaudaǵy eń eleulí jetístíktíń bíríne qol jetkízdí. Ol osy tabysymen on jyl būrynǵy aty ańyzǵa aınalǵan Denıs Tenníń jetístígín qaıtalady.
Aıdana Qūmartaeva Qytaıdyń Usı qalasynda ótken taekvondo WT boıynsha álem chempıonatynda qola júldeger atanyp, sporttyń osy túrínen Almatyǵa alǵash ret álem chempıonatynyń medalín alyp keldí. Atalǵan júlde 2007 jyldan berí Qazaqstan áıelder qūramasynyń WT álem chempıonatyndaǵy ekínshí medalí boldy.
Sondaı-aq Lıverpul qalasynda ótken bokstan álem chempıonatynda Qazaqstan qūramasy 10 medal (7 altyn, 1 kúmís pen 2 qola) jeńíp alyp, jalpykomandalyq esepte kósh bastady. Onyń íshínde 4 medal almatylyq sportshy qyzdardyń enshísínde bolyp, būl komandanyń jalpy nátıjesíníń 40%-yn qūrady.
Sóz sońynda Darhan Nūrhanūly joǵary jetístíkter sportyn damytu, daryndy sportshylardy qoldau men Almatynyń halyqaralyq sport arenasyndaǵy pozıtsıyasyn nyǵaıtu qala sayasatynyń sport salasyndaǵy strategıyalyq míndetí bolyp qala beretínín atap óttí.