2025 jylǵy 15 qyrkúıekte Almaty áýejaıyndaǵy kóliktegi polısıa basqarmasynyń krımınaldyq polısıa bólimshesiniń qyzmetkerleri buryn sottalǵan 27 jastaǵy qala turǵynyn anyqtap, ustady.
Ol qyzmettik jaǵdaıyn paıdalana otyryp, quny qymbat telefondarynyń urlyǵymen aınalysqan, - dep habarlaıdy Aqshamnews.kz.
Urlyqpen aınalysqan azamat áýe kompanıalardyń biriniń júk bóliminde jumys isteı júrip, mamyr jáne shilde aılary aralyǵynda Stambuldan keletin smartfondardy qoldy etip júrgen.
Kólik polıseıleriniń júrgizgen jedel-izdestirý is-sharalary men kásibı biliktiliginiń arqasynda kúdikti dep tanylǵan azamattyń qylmystyq áreketine tosqaýyl qoıyldy. Atalǵan azamat jalpy 33 telefondy urlaǵan. Al keltirilgen zalaldyń jalpy somasy 7 664 315 teńgeni qurady. Sotqa deıingi tergeý barysynda zalal tolyq kólemde óteldi. Almaty qalasy Túrksib aýdandyq sotynyń úkimimen aıyptalýshy kináli dep tanylyp, 2 jyl 6 aı merzimge bas bostandyǵynan aıyryldy. Kóliktegi polısıa departamenti kólik ınfraqurylymy nysandaryndaǵy qoǵamdyq qaýipsizdikti qamtamasyz etý jáne azamattar men uıymdardyń múlkine qarsy jasalatyn qylmystardyń aldyn alý úshin barlyq qajetti sharalardy qabyldap jatyr.