Almaty ákímíníń orynbasary Beıbít Shahanov jūmys sapary ayasynda qalanyń áleumettík nysandarynyń qūrylysy men qaıta jańartu barysyn tekserdí, - dep habarlaıdy Aqshamnews.kz tílshísí.
Ákímníń orynbasary N. Sats atyndaǵy balalar men jasóspírímderge arnalǵan memlekettík akademıyalyq orys teatrynyń ǵımaratyn qaıta jańartu jūmystarynyń barysyn tekserdí.
Jobada tírek qūrylymdaryn kúsheıtu, tesílgen shatyr men qasbettík kespe tastardy, barlyq ınjenerlík kommunıkatsıyany auystyru kózdelgen. Teatr jabdyqtaryn, sahna men jaryqtandyrudy 100% jańartu, jaqsy kórínísí men akustıkasy bar kórermen zalynyń klassıkalyq ólshemín saqtau josparlanǵan.
Sondaı-aq, alańy 10 myń sharshy metr bolatyn úsh qabatty jańa ǵımarat salu qarastyrylǵan. Jańa nysanda 200-den astam orynǵa arnalǵan sahnasy bar kameralyq zal, grım bólmelerí, sheberhanaǵa arnalǵan úı-jaılar, dekoratsıya saqtauǵa arnalǵan qoımalar bolady.
Búgínde negízgí ǵımaratta ınjenerlík jelíler men alǵashqy árleu jūmystary júrgízílíp jatyr, 70% qosymsha jaqtau salyndy.
«Teatrdy qaıta jańartu qala úshín mańyzdy joba jáne ony júzege asyru kezínde ǵımarattyń bíregeı sáulettík kelbetín saqtauǵa erekshe nazar audarylady. Kelesí jyly shílde aıynda qala tūrǵyndary men qonaqtary eń joǵary standarttarǵa sáıkes keletín zamanauı jáne jaıly teatrdy tamashalaı aluy úshín jūmystar barynsha sapaly álí kórsetílgen merzímínde oryndaluǵa tıís», — dedí Beıbít Shahanov.
Qala ákímíníń orynbasary būdan soń Medeu audanyndaǵy qūrylys alańyna bardy. Mūnda jylyna 50-60 myń shaqyrtuǵa qyzmet kórsetuge arnalǵan jedel medıtsınalyq járdemníń qosalqy stantsıyasynyń úsh qabatty ǵımaraty salynyp jatyr.
Qosalqy stantsıyada 15 kóshpelí jedel járdem brıgadasy táulík boıy jūmys ísteıdí, onyń qūramynda dáríger, feldsher jáne júrgízushí bolady. Ǵımarat patsıentterdí qabyldamaıdy, mūnda qyzmetkerler men jedel járdem parkí ornalasady. Būl jūmysty bıyl jyl sońyna deıín ayaqtau josparlanyp otyr.
Būǵan qosa, Almaty ákímíníń orynbasary «Raıymbek batyr» memorıaldyq kesheníníń qūrylys barysymen tanysty. Keshende muzeı, zıyarat etetín oryndar jáne ákímshílík ǵımaraty bolady.
Qazírgí uaqytta nysanda temírbeton qańqasyn montajdau, qabyrǵalardy tūrǵyzu jáne íshkí ınjenerlík kommunıkatsıya ornatu jūmystary ayaqtalyp qaldy. Keshen ártúrlí qabattaǵy jáne funktsıonaldyq maqsattaǵy úsh bloktan tūrady. Barlyq ǵımarat zamanauı materıaldardy qoldana otyryp, bíryńǵaı sáulettík stılde jasalyp jatyr.
Jūmys saparynyń sońynda avtorlyq jáne tehnıkalyq qadaǵalau qyzmetíne qūrylys jūmystarynyń oryndaluyna, paıdalanylatyn materıaldardyń sapasyna jáne jobalyq sheshímderdíń saqtaluyna baqylaudy kúsheıtu tapsyryldy. Qūrylys alańdaryndaǵy qauípsízdík máselesíne jáne barlyq normatıvtík talaptyń saqtaluyna erekshe nazar audaru kerektígí míndetteldí.
