Almaty qalasy ákímíníń orynbasary Abzal Núkenov joǵary oqu oryndarynyń rektorlarymen kezdestí. Kezdesude bílím beru júıesín damytu, ǵylymı zertteulerdí kúsheıtu jáne jastardyń qoǵamdyq, ınnovatsıyalyq árí ekologıyalyq bastamalarǵa kóptep qatystyru jaıy talqylandy.
Almaty elímízdegí írí bílím jáne ǵylym ortalyǵy. Qalada 35 joǵary oqu orny jūmys ísteıdí, onda 211 myńnan astam student bílím alyp júr, olardyń 131 myńǵa juyǵy – ózge óńírlerden kelgen jastar. 14 myńnan astam professor-oqytushy qūramynyń áleuetí qalanyń ıntellektualdy damuyna tíkeleı áser etedí.
«Bíz unıversıtetterdí Almatynyń zıyatkerlík keleshegín aıqyndaıtyn strategıyalyq seríktester retínde qarastyramyz. Bílím sapasy jastardyń básekege qabílettílígín aıqyndaıdy, al qalyptasatyn qūndylyqtar – qoǵamnyń tūraqtylyǵyn, mádenıetín, ınnovatsıyalyq damu deńgeıín jáne azamattyq jauapkershílígín nyǵaıtady», - dedí Almaty qalasy ákímíníń orynbasary Abzal Núkenov.
Kezdesude memleket aldynda sapaly bílím berudí qamtamasyz etu ǵana emes, sonymen bírge zańǵa, tártípke qūrmetpen qaraıtyn, qoǵam ómíríne belsendí aralasatyn jauapty azamattardy tárbıeleu míndetí tūrǵany atap ótíldí. Būl baǵytta joǵary oqu oryndary studenttík bastamalardy qoldau, eríktílík qyzmettí damytu jáne salauatty ómír saltyn qalyptastyru arqyly mańyzdy ról atqarady. Sondaı-aq jastardyń «Taza Qazaqstan» sıyaqty ekologıyalyq jobalarǵa qatysuy olardyń qalanyń ekologıyalyq mádenıetín damytuǵa naqty úles qosyp otyrǵanyn kórsettí.
Almaty qalasy ákímíníń janyndaǵy Ǵylym jáne tehnologıyalar jóníndegí keńestíń jūmysyna da erekshe mán beríldí. Būl keńes ǵylymı qauymdastyq pen zertteu toptaryn bíríktíríp, qalanyń ǵylymı kún tártíbín damytuǵa yqpal etedí. Ūlttyq ǵylym akademıyasymen bírlesíp tūraqty kezdesuler men forsaıt-sessıyalar ótkízílíp keledí.
Kezdesu barysynda unıversıtet basshylary bílím beru baǵdarlamalaryn jetíldíru jáne qalalyq qūrylymdarmen ózara ís-qımyldy keńeıtu jóníndegí ūsynys bíldírdí. Kezdesu qorytyndysy boıynsha jańa jobalardy damytu jáne qalanyń ǵylymı áleuetín nyǵaıtu baǵytynda jūmys toby qūrylatyn boldy. Abzal Núkenov konstruktıvtí dıalog aldaǵy yntymaqtastyqtyń tabysty boluyna berík negíz qalaıdy degen sením bíldírdí.
