Almaty qalasynyń ákímí Darhan Satybaldy kezektí jūmys sapary ayasynda kárízdík tazartu qūrylystaryn (KTQ) jáne «Sorbūlaq» shaıyndy sular jınaǵyshyn aralap kóríp, nysandardyń qazírgí jaı-kúıímen jáne olardy jańartu men tazartu júıeleríníń tıímdílígín arttyruǵa baǵyttalǵan sharalarmen tanysty.
Alǵashqy núkte Íle audanyndaǵy Jápek Batyr auylynda ornalasqan aeratsıya stantsıyasy boldy. Mūnda Almaty men qala mańyndaǵy eldí mekenderden keletín shaıyndy sular mehanıkalyqtan bastap bıologıyalyqqa deıíngí kóp satyly tazartudan ótedí. Nysan 1992 jyly salynǵan jáne búgíngí kúní qalalyq ınfraqūrylymnyń mańyzdy buyny bolyp sanalady. Jobalyq quaty táulígíne 640 myń tekshe metr, qazírgí júkteme shamamen 450 myń tekshe metr.
Sapar barysynda qala ákímí tazartu quattaryn jańǵyrtu qarqyny qala qūrylysy men ónerkásíptíń damuyna saı boluy tıís ekenín atap óttí.
«Shaıyndy sulardy tazartu sapasy qalanyń ekologıyalyq qauípsízdígíne jáne tūrǵyndardyń densaulyǵyna tíkeleı áser etedí. Mūnda tek qoldanystaǵy quattardy ūstap tūru ǵana emes, tazartu standarttaryn kóteru de mańyzdy», — dedí Darhan Satybaldy.
Tazartudan ótken su 1973 jyldan berí shaıyndy sulardy jınap, saqtauǵa arnalǵan óńírdegí eń írí ınfraqūrylym nysany «Sorbūlaq» jınaǵyshyna qūıylady. Su aıdynynyń audany 58 sharshy shaqyrym, tereńdígí 25 metrge deıín jetedí.
«Sorbūlaqtyń» jaǵdaıyn baqylau ayasynda nysanda ınjenerlík-gıdrologıyalyq zertteuler júrgízílude. Bekítílgen tehnologıyalyq reglament pen paıdalanu erejeleríne sáıkes «Almaty Su» MKK mamandary kún saıyn su deńgeıín ólshep, tūraqty ekologıyalyq jáne hımıyalyq baqylau júrgízedí. Sondaı-aq, nysanda su deńgeıín retteıtín jáne su tasqyny qaupíníń aldyn alatyn bógetter, su bólgísh jáne gıdrotehnıkalyq qūrylystar bar.
Sapar qorytyndysy boıynsha Darhan Satybaldy tazartu qūrylystaryn jańǵyrtu jáne jınaǵyshty senímdí paıdalanu boıynsha jobalyq sheshímderdí baqylauǵa aludy tapsyrdy. Ásírese, tazartu sapasyna, súzu deńgeıíne jáne halyq sanynyń artuy men qalalyq aglomeratsıyanyń keńeyuí jaǵdaıynda júktemeníń ósuíne daıyndyqqa erekshe nazar audarudy míndettedí.