Almatyda metropolıtenníń bírínshí jelísíníń ekínshí kezeńíndegí úshínshí íske qosu kesheníníń qūrylysy jalǵasyp jatyr. Qala ákímí Darhan Satybaldy jūmys sapary ayasynda "Qalqaman" metro beketí men oǵan jalǵasatyn tonnelderdegí jūmys barysymen tanysty.
Sol jaq aralyq tonnelde "B. Momyshūly" beketínen salynyp jatqan "Qalqaman" beketíne deıíngí aralyqta relster tóseu tolyq ayaqtaldy. Tonnel íshínde elektrmen jabdyqtau kabelderí, su qūbyry jáne drenaj júıesí tartyldy, ınjenerlík jabdyqqa arnalǵan kronshteınder ornatyldy. Endígí kezeńde beınebaqylau, dybystyq habarlau, órt jáne qauípsízdík dabyl beru júıelerín ornatu josparlanǵan. Sonymen qatar oń jaq peregondyq tonneldí qazu jūmystary jalǵasyp keledí: jalpy ūzyndyǵy 1 593 metrdíń 1 285 metrí júrgízíldí, 308 metrí qaldy.
Stantsıyanyń ózínde monolıttík qūrylymdar ayaqtaluǵa jaqyn, kerí topyraq toltyru júrgízílíp jatyr. Íshkí keńístíkte árleu jūmystary, ınjenerlík kommunıkatsıyalar tartu jáne jabdyqty montajdauǵa daıyndyq júríp jatyr. Barlyq óndírístík operatsıyalar táulík boıy atqarylady. Jalpy nysanda 478-den astam maman eńbek etude: onyń 149-y jerasty jūmystarynda, 329-y – ashyq alańdarda.
Darhan Satybaldy bekítílgen merzímdí qatań saqtaudyń jáne jūmystardyń joǵary sapasyn qamtamasyz etudíń mańyzdylyǵyn atap óttí. Ákímníń aıtuynsha, "Qalqaman" metro beketíníń qūrylysy Almatynyń kólík júıesí úshín strategıyalyq mánge ıe jáne metronyń batys baǵyttardaǵy qoljetímdílígín aıtarlyqtaı arttyrady.
Qūrylys-montaj jūmystary 2026 jyldyń bírínshí jartysynyń ayaǵyna deıín ayaqtau josparlanǵan.