Almaty ákímí Darhan Satybaldy kúzgí aǵash otyrǵyzu, kóshelerdí sanıtarlyq tazalau jáne qalalyq ortany abattandyrudyń jańa standarttaryn engízu boıynsha keńes ótkízdí.
Josparǵa sáıkes, kúzgí kezeńde megapolıste 53 myńnan astam aǵash otyrǵyzu kózdelíp otyr, onyń íshínde bıíktígí 4-5 metr bolatyn 9,3 myń írí aǵash bar. Sonymen qatar, kesílgen aǵashtyń ornyna 22 myńnan astam tal egu jáne 356 myń būtaqtan tūratyn buferlík jasyl aımaqtar qūru josparlanǵan. Alatau, Nauryzbaı jáne Jetísu audandaryna erekshe nazar audarylady. Jūmystar avtomatty suaru júıesín ornatu jóníndegí būryn ázírlengen josparǵa (52 uchaske, 290 km) jáne ázírleníp jatqan dendrologıyalyq josparǵa sáıkes júrgízíledí. Qalalyq tálímbaq qūruǵa daıyndyq jūmystary jalǵasyp jatyr, jobalyq jūmystardy 2026 jyldyń sońyna deıín ayaqtau josparlanǵan.
Kósheler men qoǵamdyq keńístíkterdí keshendí abattandyru baǵdarlamasy ūsynyldy. Baǵdarlamanyń negízgí elementí retínde skverler, bulvarlar, jayau júrgínshíler kóshelerí men shaǵyn jasyl aımaqtardy kútíp-ūstaumen ortalyqtandyrylǵan túrde aınalysatyn «Jasyl Almaty» KMM-ín qūru kózdelíp otyr. Baǵdarlama ayasynda abattandyru men kógaldandyru boıynsha bíryńǵaı standarttar engízíledí.
Landshaftyq dızaındy damytuǵa, kópjyldyq ósímdíkter úlesín arttyruǵa, avtomatty suaru jáne jaryqtandyru júıelerín engízuge, sondaı-aq, jaıly árí qauípsíz qalalyq orta qūruǵa erekshe nazar audarylady.
Sonymen bírge, sanıtarlyq tazalaudyń bíryńǵaı reglamentí ázírlenude. Qūjatta jūmystardyń sapasyna qoıylatyn naqty talaptar, qolmen jáne tehnıkamen tazalau kólemíníń esebí, qyzmetker sanyna qatysty normatıvter men olarǵa yńǵaıly etíp beıímdelgen jańartylǵan keste qamtylady.
Qala ákímí Darhan Satybaldy bólíngen qarajattyń maqsatty paıdalanyluyna baqylaudy kúsheıtudí tapsyrdy. Onyń aıtuynsha, eger abattandyruǵa aqsha bólínse, onda ol boıynsha naqty nátıje boluǵa tıís.
«Merdígerler men vedomstvolyq mekemeler jūmysty naqty atqaruy kerek. Kóp jerde suaru júıesí ístemeıdí, jer telímí qyzmet kórsetíletín aımaq retínde tírkelgenímen, ís júzínde kútím jasalmaıdy. Mūny túzeu qajet. Audan ákímdíkterí arqyly bólínetín qarjy qatań baqylauda boluǵa tıís», – dedí ákím.