Almaty qalasynyń ákimi Darhan Satybaldy Áýezov aýdanyndaǵy Jastar komúnıtı-ortalyǵyna baryp, jastarmen emen-jarqyn kezdesý ótkizdi, dep habarlaıdy aqshamnews.kz
Júzdesýdiń negizgi ózegi jumys tabý, kásibı damý, qalalyq jáne ekologıalyq bastamalarǵa qatysý máseleleri boldy.
Ashyq dıalog barysynda belsendi jastar tyń ıdeıalaryn bólisti, oıǵa alǵan jobalary týraly aıtyp, jastardy qoldaýdyń jańa formattaryn usyndy. Olar suranysqa ıe mamandyqtar boıynsha qysqa merzimdi oflaın-kýrstardy iske qosý, «Taza Qazaqstan» ekologıalyq aksıasyna qatysý, jas muǵalimder men dárigerlerdi ýaqyt talabyna saı ózekti soft skills-ke oqytý syndy máselelerdi kóterdi.
Kezdesý barysynda aldaǵy 12 tamyzda atap ótiletin Halyqaralyq jastar kúnine daıyndyqqa erekshe nazar aýdaryldy. Almatyda jastardy áleýmettik mańyzy bar qyzmetke tartýǵa, olardyń kóshbasshylyq qasıetterin damytýǵa jáne belsendi azamattyq ustanymyn qalyptastyrýǵa baǵyttalǵan birqatar is-shara josparlanýda.
Shahar basshysy jastardyń óz kózqarasyn, azamattyq ustanymyn erkin tanytýǵa jáne olardyń qalanyń damýyna óz úlesin qosýyna qolaıly jaǵdaı jasaýǵa múmkindik beretin «jastar qatysatyn búdjet» tetigin ázirleýdi tapsyrdy.
«Búginde Almatyda 700 myńnan astam jas turady. Olardyń árqaısysynyń sapaly bilimge, kásibı jáne shyǵarmashylyq damýyna qol jetkizýin qamtamasyz etý, olardyń áleýetin iske asyrý – bizdiń ortaq mindetimiz», – dep atap ótti Almaty ákimi Darhan Satybaldy.
Qala basshysy kezdesýde aıtylǵan barlyq usynys muqıat qaralyp, zerdelenip, múmkindiginshe iske asyrylatynyn atap ótti. Jastardyń damýy úshin jaǵdaı jasaý – qala saıasatynyń basym baǵyttarynyń biri.
Búgingi kúni qalada 11 komúnıtı-ortalyq jumys isteıdi. Onda jastar psıhologıalyq jáne zań kómeginen bastap, kásiptik baǵdar alýǵa, tildik kýrstar men memlekettik baǵdarlamalar boıynsha konsýltasıalarǵa deıin tegin qyzmet alady. Atalǵan qaýymdastyqtar qalanyń jas turǵyndarynyń múmkindigin, darynyn ashýǵa, kez-kelgen bastamalaryn qoldaýǵa daıyn, esigi árqashan ashyq zamanaýı ortalyqqa aınalyp keledi.